नाशिक : शहरात विनाहेल्मेट दुचाकी चालविताना पोलिसांनी पकडल्यास दुचाकीचालकांची परीक्षा घेण्यात येणार आहे. बुधवार (ता.१) पासून या आदेशाची अंमलबजावणी वाहतूक विभागातर्फे शहरात केली जाणार आहे. जर या परीक्षेत दहापैकी पाच गुण न मिळाल्यास चालकांना दोन तासांत अभ्यास करून पुन्हा परीक्षेला सामोरे जावे लागणार आहे.

हेल्मेटचा वापर वाढविण्याच्या दृष्टीने पोलिस आयुक्त दीपक पांडे यांनी जर दुचाकीचालकाकडे हेल्मेट नसल्यास त्यास दोन तास नाशिक फर्स्ट येथे समुपदेशन करण्याची कारवाई केली होती. यानंतर ‘नो हेल्मेट नो पेट्रोल ही’ मोहीम १५ ऑगस्टपासून शहर हद्दीत सुरू केली होती. त्यानंतर सर्व शासकीय, खासगी कार्यालये, आस्थापना या ठिकाणी हेल्मेटसक्ती करण्यात आली. मात्र, या सर्व उपाययोजना अपुऱ्या पडत असल्याने पोलिस आयुक्त दीपक पांडे यांनी आता समुपदेशन ही प्रक्रिया बंद करण्याचा निर्णय घेण्यात आला आहे.

यानंतर आयुक्तांनी नवीन नियमावली जाहीर केली आहे. या नियमांची अंमलबजावणी बुधवार (ता.१) पासून शहरात केली जाणार आहे. या नव्या नियमानुसार आता हेल्मेट वापर न करणाऱ्या दुचाकीस्वारांना दहा गुणांच्या परीक्षेस सामोरे जावे लागणार आहे. यात हेल्मेट नसल्यास पकडले गेले तर त्याचे दोन तासांचे समुपदेशन केले जाईल. यानंतर दहा गुणांची परीक्षा होईल. जर दहापैकी पाच गुण मिळविल्यास त्याच वाहन त्यास परत दिले जाईल. मात्र, चार गुण मिळाल्यास पुन्हा दोन तासांचे समुपदेशन केले जाईल. यासाठी मोटार वाहन कायद्यातील तरतुदींचे एक बुकलेट तयार करण्यात आले आहे. हे बुकलेट संबंधित दुचाकीस्वारांसाठी पुस्तकाचे

काम करेल.

१२ केंद्र निश्‍चित

हेल्मेट नसल्यास कारवाई करण्यासाठी शहरातील गर्दीची बारा ठिकाणी निश्‍चित करण्यात आली आहे. या ठिकाणी दुचाकीचालक व त्यांच्या पाठीमागे असलेल्या व्यक्तीने हेल्मेट घातले नसल्यास त्यांच्यावर ही कारवाई होणार आहे.