नाशिक : गेल्या साडेतीन वर्षांपासून रखडलेल्या महाराष्ट्र पोलिस दलातील भरतीला प्रारंभ झाला. या भरतीसाठीची मैदानी चाचणी अजूनही काही जिल्ह्यांमध्ये सुरू आहे. काही जिल्ह्यात उमेदवारांची मैदानी चाचणी संपली आहे.

पात्र ठरलेल्या उमेदवारांना आता लेखी परीक्षेची प्रतिक्षा लागून आहे. मात्र शासनाकडून अद्याप लेखी परीक्षेसाठीची तारीख निश्‍चित करण्यात आलेली नाही. परिणामी, उमेदवारांना अभ्यासासाठी अधिकचा वेळ मिळतो आहे. (written exam for police recruitment been postponed nashik news)

महाराष्ट्र पोलिस दलात गेल्या तीन-साडेतीन वर्षांपासून भरती प्रक्रिया रखडलेली होती. राज्यभरातील तरुणांकडून वारंवार भरती प्रक्रिया सुरू करण्याची मागणी केली जात होती. त्याची दखल घेत गेल्या नोव्हेंबर महिन्यात शासनाने पोलिस भरतीचे संकेत दिले.

त्यानुसार ऑनलाइन अर्ज दाखल करण्याची प्रक्रिया सुरू झाली. डिसेंबर महिन्यात अर्ज दाखल करण्याच्या प्रक्रियेला १५ दिवसांची मुदतवाढ देण्यात आली. त्यानंतर, २ जानेवारीपासून प्रत्यक्ष मैदानी चाचणीला प्रारंभ झाला.

राज्यातील प्रत्येक जिल्ह्यात ही प्रक्रिया सुरू आहे. काही जिल्ह्यांमध्ये रिक्त जागांची संख्या कमी असल्याने तेथील मैदानी चाचणी आटोपली आहे. काही जिल्ह्यांच्या ठिकाणी अजूनही मैदानी चाचण्या सुरू आहेत.

हेही वाचा : प्राप्तिकर उत्पन्न सवलत मर्यादा वाढणार?

यामुळे ज्या उमेदवारांची मैदानी चाचणी होऊन ते पात्र ठरले आहेत त्यांना लेखी परीक्षेची प्रतिक्षा लागून आहे. मात्र अद्याप शासनाकडून पोलिस भरतीसाठीच्या लेखी परीक्षेची तारीख निश्‍चित केलेली नाही. उलट, काही ठिकाणी मैदानी चाचण्या सुरू असल्याने लेखी परीक्षाच लांबणीवर पडण्याची शक्यता निर्माण झालेली आहे.

‘कट’ऑफही जाहीर होईना

नाशिक ग्रामीण पोलिस दलातील १७९ जागांसाठीची मैदानी चाचणी २० तारखेपर्यत घेण्यात आल्या. सोमवारपासून (ता. २३) १५ जागांसाठीच्या पोलिस चालक पदासाठीची कट ऑफ जाहीर होऊन त्यानुसार ड्रायव्हिंगची चाचणी सुरू झाली आहे. परंतु, १६४ पोलिस शिपाई पदासाठीचा कटऑफ अद्याप जाहीर झालेला नाही. उमेदवारांना या कटऑफची प्रतिक्षा लागून आहे.