झोडगे (जि.नाशिक) : बारा वर्षांपूर्वी बालपणी मातृछत्र हरवलेल्या 17 वर्षांचा शशांक संजय अहिरे हा बारावी विज्ञान शाखेतून चांगल्या गुणांनी उत्तीर्ण झाला. त्यानंतर औषध निर्माण शाखेत प्रवेश घेऊन वडिलांचे स्वप्न पूर्ण करण्याची इच्छा व्यक्त केली होती. मात्र नियतीच्या मनात काही वेगळेच होते. त्या घटनेने अहिरे कुटुंबावर मोठा आघात झाल्याने सर्वत्र हळहळ व्यक्त केली जात आहे.

बालपणी हरवले मातृछत्र, वडिलांचे स्वप्नही अपूर्ण; 17व्या वर्षीच जगाचा निरोप

लहान असतानाच आई जगातून निघून गेल्याने नववीच्या वर्गात शिकत असलेला शशांक अणि त्याची बहिण पोरके झाले होते. शशांकचे वडील संजय अहिरे यांची आर्थिक परिस्थिती बेताची असल्याने रोजगारासाठी मुंबईची वाट धरली. तेथे काही दिवस हाँटेलमध्ये काम केले. त्यानंतर रिक्षा चालवून दोन्ही मुलाचे भविष्य उज्ज्वल करण्यासाठी दिवसरात्र काम करुनी मुलांचे संगोपन करत असतानाच कोरोना संकटात रिक्षा व्यवसाय बंद असल्याने उदरनिर्वाहासाठी गावाकडील वाट धरावी लागली. पण गणेश विसर्जनाच्या दिवशी (ता.१९) आपल्या मित्र परिवारसह अस्ताने गावाजवळील मोती तलावात गणेश विसर्जनासाठी गेला असताना खोल पाण्याचा अंदाज न आल्याने पाण्यात बुडाला. शशांकला वाचविण्यासाठी ग्रामस्थांनी प्रयत्न केले. मात्र तलावाच्या तळाशी शशांक अडकला. अणि पाण्यात बुडून त्याचा मृत्यू झाला. शशांकला बाहेर काढून उपचारासाठी झोडगे येथील ग्रामीण रुग्णालयात भरती करण्यात आले. तेथून मालेगाव येथील सिव्हील हॉस्पिटलमध्ये नेण्यात आले होते. मात्र उपचारा पूर्वीच निधन झाले होते. शशांक अहिरे याचे गणेश विसर्जनच्या वेळी पाण्यात बुडवून मृत्यू झाल्याने अस्तानेसह माळमाथा परीसरात हळहळ व्यक्त केली जात आहे..