नाशिक : सातपूर परिसरातील श्रमिकनगरमध्ये २३ वर्षीय तरुणाने इमारतीच्या चौथ्या मजल्यावरून उडी घेत आत्महत्या केल्याची दुर्दैवी घटना घडली. नवीन मोबाईल घेण्यासाठी आई- वडील पैसे देत नसल्याच्या कारणातून या तरुणाने आत्महत्या केल्याचे समोर येते आहे. सदर घटना शुक्रवारी (ता. ९) पहाटे दोनच्या सुमारास घडली असून, या घटनेमुळे खळबळ उडाली आहे.

अक्षय अरुण खेताडे (23, रा. इस्पाईट हाईट्स, श्रमिकनगर, सातपूर) असे मयत तरुणाचे नाव आहे. पोलिसांनी दिलेल्या माहितीनुसार, अक्षय सध्या बेरोजगार असून, त्यास मद्याचे व्यसन होते. काही दिवसांपूर्वीच त्याचा मोबाईल हरवला होता. त्यामुळे तो सतत आई- वडिलांकडे नवीन मोबाईल घेण्यासाठी तगादा लावत होता. मात्र, त्याला मद्याचे व्यसन असल्याने पालकांनी त्याला मोबाईल घेण्यासाठी पैसे दिले नव्हते.

हेही वाचा: Credit Score :असा वाढवा तुमचा ‘क्रेडिट स्कोअर’

दरम्यान, शुक्रवारी (ता. ९) पहाटे दोनच्या सुमारास अक्षय याने घराच्या दरवाज्याची बाहेरून कडी लावून घेतली आणि चौथ्या मजल्यावर गेला व तेथून त्याने खाली उडी घेतली. सदर घटना लक्षात येताच त्याला कुटुंबाने जिल्हा रुग्णालयात दाखल केले. त्याच्या डोक्याला गंभीर मार लागल्याने अतिरक्तस्राव झाला होता. वैद्यकीय अधिकाऱ्यांनी तपासून मयत घोषित केले. याप्रकरणी सातपूर पोलिसात अकस्मात मृत्यूची नोंद करण्यात आली आहे.