Dhule Crime : परराज्यातून होणारी विदेशी मद्यतस्करी रोखण्यात राज्य उत्पादन शुल्क विभागाच्या हाडाखेड (ता. शिरपूर) पथकाला यश आले.

पथकाने गस्तीदरम्यान सोनगीर-चिमठाणे रस्त्यावरील एका हॉटेलजनीक ४४ लाखांचा मद्यसाठा तसेच वाहन जप्त केले. (Smuggling liquor from abroad 44 lakh foreign liquor stock seized Dhule Crime)

मुंबई-आग्रा महामार्गावरून परराज्यातून विदेशी मद्याची तस्करी होत असल्याची माहिती राज्य उत्पादन शुल्क विभागाला मिळाली. त्यानुसार १४ जुलैला हाडाखेड (ता. शिरपूर) सीमा तपासणी नाक्यावरील राज्य उत्पादन शुल्क विभागाच्या गस्तीपथकाने सोनगीर-चिमठाणे रोडवर संशयित वाहनाची (एमएच-१५/जेसी-०४६९) तपासणी केली.

वाहनात परराज्यातील एकूण ७३० खोके विदेशी मद्य आढळले. कारवाईत ४४ लाखांचे विदेशी मद्य व १५ लाखांचे वाहन असा एकूण ५९ लाखांचा मुद्देमाल जप्त करून गुन्हा दाखल केला.

राज्य उत्पादन शुल्क नाशिक विभागाचे उपायुक्त डॉ. बी. एच. तडवी, धुळ्याचे अधीक्षक मनोज शेवरे यांच्या मार्गदर्शनाखाली पथकातील निरीक्षक ए. पी. मते, दुय्यम निरीक्षक एस. ए. चव्हाण. पी. एस. धाईजे, बी. एस. चोथवे, ए. सी. मानकर, एस. एस. शिंदे, एस. एस. आवटे, एस. एस. गोवेकर, प्रशांत बोरसे, गोरख व्ही. पाटील, के. एम. गोसावी, केतन जाधव, डी. टी. पावरा, एस. एच. देवरे, एम. एस. धुळेकर, हेमंत पाटील, विजय नाहीदे, नीलेश मोरे यांच्या पथकाने ही कारवाई केली.