कळंबू (जि. नंदुरबार) : पावसाने यंदा हुलकावणी दिल्याने शेतकरी चिंताग्रस्त झाले आहेत. पेरणी कालावधीही निघून जात असल्याने यंदाच्या पेरण्याही यशस्वी होतील की नाही या विवंचनेत बळिराजा आहे. शेतकरी आकाशाकडे डोळे लाऊन पावसाची वाट पाहत आहे. नंदुरबार जिल्ह्यातील काही भागात पावसाने हजेरी लावली खरी मात्र शहादा तालुक्यात अद्यापही एकही पाऊस समाधानकारक नसल्याने शेतकरी चिंतेत असून, पेरण्या खोळंबल्या असल्याचे चित्र आहे.

पावसाने दडी दिल्याने शेतात वखरणी करायची आहे, मात्र पाऊस न झाल्यामुळे हे शेतातील ढेकळे फुटत नाहीत. आता बळिराजा आतुरतेने पावसाची वाट पाहत आहेत. पदरमोड करुन, उसनवारी करुन खत, बी बियाणे शेतकऱ्यांनी आणून ठेवले आहेत. आता फक्त प्रतीक्षा फक्त पावसाची आहे यावर्षी हवामान विभागाने वर्तवलेला अंदाज जवळपास खरा ठरत आहे. जिल्ह्यातील काही भागात शेतकऱ्यांनी खरिपाच्या पेरण्याला सुरवात केली आहे. मात्र शहादा तालुक्यातील अनेक गावामध्ये अद्यापही पेरण्या खोळंबल्या आहेत. आज येईल, उद्या येईल या भरवशावर पूर्ण जून महिना उलटण्याच्या मार्गावर आहे. समाधानकारक पाऊस नसल्याने पेरण्या खोळंबल्या आहेत. शेतकरी आकाशाकडे डोळे लाऊन पावसाची वाट पाहत आहे.

१२ जूनला झालेल्या पहिल्या पावसाच्या आधारे शेतकऱ्यांनी कापूस लागवड केली. मात्र लागवडीनंतर पावसाने हुलकावणी दिल्याने बळिराजा हवालदिल झाला. लावणी केलेले महागडे कापूस बियाणे वाया जाऊन शेतकरी आर्थिक संकटात सापडला आहे. रोजच दिवसभर उकाडा होऊन वातावरणात बदल होतो, मात्र पावसाच्या हुलकावणीमुळे शेतकरी चिंतातुर आहे. शेतमजुरांच्या हाती कामे नसल्याने उदरनिर्वाहाचा प्रश्न निर्माण झाला आहे.