पिंपळनेर : जेबापूर (ता. साक्री) येथे भर चौकातील अनिल भदाणे यांच्या घरी बुधवारी (ता.२४) पहाटे २४ तोळे सोन्याच्या दागिन्यांची धाडसी चोरी झाल्याचे उघडकीस आले. एलसीबी पथक, डॉग पथक, फिंगर प्रिंट पथक दाखल झाले. मात्र गावाच्या वेशीपर्यंतच डॉगने मार्ग दाखवला. पिंपळनेर पोलिसात याबाबत चोरट्याविरुद्ध गुन्हा दाखल झाला आहे. 

आवश्य वाचा-  दुर्दैवी घटना: व्याहीच्या अंत्यविधीहून परतणाऱ्या विहिणीचा अपघातात मृत्यू 
 

पिंपळनेरपासून अवघ्या तीन किलोमीटरवर असलेले जेबापूर येथील अनिल भदाणे हे नोकरीनिमित्त नाशिक येथे स्थायिक झाले त्यांची आई इंदुबाई भदाणे या जेबापूर येथेच राहत होत्या. त्यांची तब्येत बिघडल्याने त्या आठ दिवसांपूर्वी नाशिक येथे उपचारासाठी मुलाकडे गेल्या होत्या. घर बंद असल्याचा डाव चोरट्यांनी साधला. या घराजवळच राहणारे शिवाजी भदाणे यांना पहाटे घराच्या दाराचे कुलूप खाली पडलेले दिसले. त्यांनी आत प्रवेश केला असता ओसरी व मधल्या घरातील गोदरेज कपाट तोडलेले दिसले. त्यांनी फोनवरून अनिल भदाणे यांना चोरी झाल्याची माहिती दिली.

आवर्जून वाचा- खानदेशच्या सुपुत्राचा गुजरात मध्ये डंका ! दुसऱ्यांदा नगरसेवक पदी विजयी
 

चोरट्यांनी घरातील कपाटे तोडून त्यातील २४ तोळे सोन्याचे दागिने त्यात नेकलेस, राणी हार, चैन, बांगड्या, अंगठी, पाटल्या, डबल गोपची सरी व इतर किरकोळ सोने असा एकूण २४ तोळे सोन्याचा ऐवज लंपास केल्याचे अनिल भदाणे यांनी सांगितले. धुळे येथून सायंकाळी चारला डॉग पथक, फिंगरप्रिंट पथक, एल सी बी पथक, उपविभागीय अधिकारी प्रदीप मैराळे, पिंपळनेर साहाय्यक पोलीस निरीक्षक दिलीप खेडकर व त्यांचे कर्मचारी घटनास्थळी दाखल झाले होते. 

संपादन- भूषण श्रीखंडे