ब्राह्मणगाव (जि.नाशिक) - जुनी शेमळी (ता.बागलाण) येथील शेतकरी एकनाथ भिला बच्छाव यांच्या शेतातील गोटफार्मजवळील पाण्याच्या टाकीत व विहिरीत कुटुंबिय बाहेर गेल्याचा फायदा घेत अज्ञात व्यक्तीने सोमवारी (ता.४) रोजी विषारी औषध टाकून संपूर्ण पाणी खराब केल्याची धक्कादायक घटना घडली असून परिसरात खळबळ उडाली आहे. याप्रकरणी संबंधित शेतक-याने कृषी, महसूल व पोलीस प्रशासनाकडे तक्रार दाखल करूनही अद्याप आधिका-यांनी दखल न घेतल्याने परिसरातील उलटसुलट चर्चेला उधाण आले आहे.

एकनाथ बच्छाव यांचे शेमळीपासून काही अंतरावर असलेल्या शेतात गोठफार्म तयार केला आहे. या गोटफार्मच्या जवळच बच्छाव कुटुंबिय वास्तव्यास आहेत. सोमवारी (ता.४) रोजी त्यांच्या भाऊबंदकीत कार्यक्रम असल्याने संपुर्ण कुटुंबिय कार्यक्रमाच्या निमित्ताने गेले होते. याचाच फायदा घेऊन अज्ञात व्यक्तीने सायंकाळी चार वाजेच्या सुमारास गोटफॉर्मजवळील पाण्याच्या टाकीत व विहिरीत विषारी औषध टाकून पाणी खराब केले, श्री. बच्छाव हे दुस-या दिवशी मंगळवारी (ता.५) विहीरीवरील पंप सुरू करण्यासाठी गेले असता सदरची बाब सकाळी लक्षात आली. विहिरीत विषारी औषध अज्ञात व्यक्तीने टाकल्याची बातमी वा-यासारखी पसरली व ग्रामपंचायत सरपंच, उपसरपंच आणि ग्रामस्थांनी विहिरीकडे धाव घेतली. 

घटनेची माहिती कृषी विभाग व महसूल विभागात कळविण्यात आली. मात्र घडलेल्या ठिकाणी जिवीतहानी झाली नसल्याचे सांगत संबंधित कर्मचा-यांनी हात झटकले व आपण याबाबत काहीही करू शकत नसल्याचे शेतक-यास सांगितले. शेतकरी बच्छाव यांनी सटाणा पोलिसांत तक्रार दाखल केली आहे. मात्र पोलिस आजूनही घटनास्थळी फिरकलेच नसल्याचे सांगितले जाते. सुदैवाने या विहीरीतील पाणी कुटुंबियांनी व पाळीव जणावरांनी प्यायले नसल्याने पुढील अनर्थ टळला. प्रशासन कुठलीही घटना ही जिवीतहानी झाल्याशिवाय काही करू शकत नसल्याचा अजब सल्ला ऐकून ग्रामस्थांनी संबंधित कर्मचा-याबाबत संताप व्यक्त केला आहे. पोलिसांनी विहिरीत विषारी औषध टाकणा-या अज्ञात इसमाचा शोध घेऊन त्याच्यावर कडक कार्यवाही करण्याची मागणी बच्छाव कुटूंबियांसह ग्रामस्थ व शेतकऱ्यांनी केली आहे.