Nandurbar News : हतनूर धरणातून दोन हजार ३३० क्यूसेक पाण्याचा विसर्ग सुरू आहे. त्यानुसार सुलवाडे, सारंगखेडा, प्रकाशा बॅरेजेसचे सकाळी नऊला प्रत्येकी दोन गेट अर्धा मीटरने उघडण्यात आले आहेत. (Villages on banks of Tapi river alert nandurbar news)

त्यातून सुलवाडे (३,७७६ क्यूसेक), सारंगखेडा (३,५९२ क्यूसेक्स), प्रकाशा (३,७०४ क्यूसेक) विसर्ग तापी नदीपात्रात सोडण्यात आला. काठावरील गावांना सतर्कतेचा इशारा देण्यात आला आहे.

यंदाच्या हंगामात तब्बल दोन आठवडे उशिराने पहिल्यांदा पाणीपातळीत वाढ झाल्याने हतनूर (जि. जळगाव) धरणाचे दोन दरवाजे अर्धा मीटरने उघडून दोन हजार ३३० क्यूसेक पाण्याचा विसर्ग तापी नदीपात्रात सुरू आहे. त्यामुळे खानदेशातील तापी नदीवरील तिन्हीही बॅरेजेसचे द्वार परिचालन करणे प्रक्रियेला सोमवारी (ता. १०) सकाळी नऊला सुरवात करण्यात आली.

हेही वाचा : Credit Card फसवणूक....काय घ्याल काळजी?

त्यात सुलवाडे बॅरेजमधून ३,७७६ क्यूसेक, सारंगखेडा ३,५९२ क्यूसेक, तर प्रकाशा बॅरेज मध्यम प्रकल्पातून ३,७०४ क्यूसेक पाण्याचा विसर्ग तापी नदीत करण्यात आला. प्रकाशा बॅरेज मध्यम प्रकल्पाचे गेल्या वर्षी २८ जूनला द्वार परिचालन प्रक्रियेला सुरवात झाली होती, तर १५ ऑक्टोबरला शंभर टक्के पाणीसाठा प्रकाशा बॅरेज मध्यम प्रकल्पात करण्यात आला होता.

सोमवारी द्वार परिचालनापूर्वी येथील प्रकल्पाची पाणीपातळी १०९.२० मीटर होती. दोन दरवाजे उघडले असून, पाण्याचा येवा लक्षात घेता विसर्ग वाढविण्यात येऊ शकतो. तापी नदीकाठावरील गावांना सतर्कतेचा इशारा देण्यात आल्याची माहिती प्रकाशा पाटबंधारे विभागाचे शाखा अभियंता मयूर परदेशी यांनी दिली.