करहल : मैनपुरी जिल्ह्यातील (Mainpuri District) करहल विधानसभा मतदारसंघात (Karhal Assembly constituency) भारतीय जनता पक्षाचे (BJP) उमेदवार एसपी सिंह बघेल (SP Singh Baghel) विरुद्ध समाजवादी पक्षाचे प्रमुख अखिलेश यादव (Akhilesh Yadav) यांच्यात मोठी लढत पहायला मिळत आहे. मात्र, जातीय समीकरणाचा विचार केला तर करहल मतदारसंघात सुमारे 3 लाख 70 हजार मतदार आहेत. यात यादव समाजातील मतदारांची संख्या 1 लाख 40 हजारांहून अधिक आहे. तर, 14 हजार मुस्लिम आहेत. याच मतदारसंघात ठाकूर, ब्राह्मण, शाक्य या समाजातील मतदारांची संख्याही दीड लाखाहून अधिक आहे.

या जागेवर अखिलेश यांना घेरण्यासाठी भाजपनं चक्रव्यूह निर्माण केलाय. मुख्यमंत्री योगी आदित्यनाथ (Yogi Adityanath) यांच्यापासून ते गृहमंत्री अमित शहा (Amit Shah) यांच्यापर्यंत या मतदारसंघात दोन मोठ्या रॅली झाल्या आहेत. भाजपचे अनेक बडे नेतेही मतदारांच्या सतत संपर्कात आहेत. भाजप या भागात ज्या पद्धतीनं काम करत आहे, ते पाहून सपा सतर्क झालीय. त्यामुळं समाजवादी पक्षानं अखिलेश यांच्या विजयाची सर्व समीकरणं बदलण्यास सुरुवात केलीय.

अखिलेशसाठी मुलायमसिंह यादवही प्रचारात

करहल विधानसभा मतदारसंघात अखिलेश यांचा विजय निश्चित करण्यासाठी संपूर्ण कुटुंब निवडणुकीत गुंतलं असून आज खुद्द मैनपुरीचे खासदार मुलायमसिंह यादव (Mulayam Singh Yadav) आपल्या मुलाच्या प्रचारासाठी मैदानात उतरलेत. करहल शहरातील एका पुस्तकाच्या दुकानात उभ्या असलेल्या रोहितला पत्रकारांनी विचारलं, तुला कोणाचा विजय पाहायचाय? यावर तो म्हणाले, मला अखिलेशजींचा विजय बघायला आवडेल, असं त्यानं सांगितलं. तर, अखिलेश यांना करहलमध्ये एवढा प्रचार करण्याची काय गरज? असा सवाल भाजप समर्थक राजेश यांनी उपस्थित केलाय. ते म्हणाले, तुम्ही फक्त विचार करा. एवढे मोठे नेते असताना मग अख्खं कुळ प्रचारात उतरवून का प्रचार करत आहेत. याचा अर्थ इथं काहीतरी आहे, असं त्यांनी स्पष्ट केलं आणि अखिलेश यांच्यावर निशाणा साधला.