लखनऊ : उत्तर प्रदेशची राजधानी लखनऊमध्ये पेट्रोल (Petrol) आणि डिझेल (Diesel) भरण्यावर दोन टक्के सूट मिळणार आहे. या सूटचा लाभ घेण्यासाठी फक्त मतदान करावे लागणार आहे. लखनऊमध्ये सध्या पेट्रोल ९५.२८ रुपये आणि डिझेल ८६.८० रुपये प्रति लीटर दराने विकले जात आहे. विधानसभा निवडणुकीच्या तोंडावर ही खास ऑफर देण्यात आली आहे. (Two per cent discount on petrol-diesel)

लखनऊ पेट्रोलियम डीलर्स असोसिएशनने सांगितले की, राज्याच्या राजधानीत मतदानाचे चिन्ह दाखविल्यास लोकांना डिझेल (Diesel)-पेट्रोलवर दोन टक्के सूट मिळेल. पेट्रोल (Petrol) पंपाच्या व्यवस्थापक सुनीता दीक्षित यांनी सांगितले की, लोकांना सकाळी सात ते सायंकाळी सहा वाजेपर्यंत ही सूट देण्यात येणार आहे. हा उपक्रम लोकांना आवडला आणि त्यामुळे मतदानाचा टक्काही वाढेल. म्हणजेच बुधवारी सकाळी ७ ते सायंकाळी सहा या वेळेत पेट्रोल आणि डिझेल भरण्यावर ही सूट मिळेल.

उत्तर प्रदेश (uttar Pradesh) विधानसभा निवडणुकीच्या (Assembly Election) चौथ्या टप्प्यासाठी बुधवारी (ता. २३) मतदान पार पडणार आहे. चौथ्या टप्प्यात पिलीभीत, खेरी, सीतापूर, हरदोई, उन्नाव, लखनऊ, रायबरेली, बांदा आणि फतेहपूर येथे मतदान होणार आहे. उत्तर प्रदेशच्या नऊ जिल्ह्यांतील ५९ जागांवर मतदान होणार आहे.