अचलपूर : येथील तहसील कार्यालयात सोमवारी (ता.१७) लाचलुचपत प्रतिबंधक खात्याच्या अधिकाऱ्यांनी केलेल्या कारवाईत नायब तहसीलदारांना १८ हजार रुपयांची लाच घेताना पकडण्यात आले.

शंकर श्रीराव असे त्या नायब तहसीलदाराचे नाव असल्याचे लाचलुचपत प्रतिबंधक खात्याचे पोलिस अधीक्षक विशाल गायकवाड यांनी सांगितले. संबंधित नायब तहसीलदारांनी काही दिवसांपूर्वी एक वाळूचे वाहन पकडले होते. कारवाई टाळण्यासाठी संबंधितांकडे २० हजार रुपयांची मागणी करण्यात आल्याची तक्रार लाचलुचपत प्रतिबंधक खात्याकडे करण्यात आली होती.

त्यावरून एसीबीच्या पथकाने आज येथील तहसील कार्यालयात सापळा लावला. सायंकाळी साडेपाच ते सहा वाजताच्या सुमारास १८ हजार रुपयांची लाच घेताना नायब तसहीलदाराला लाचलुचपत प्रतिबंधक खात्याच्या अधिकाऱ्यांनी पकडले. त्यांच्यावर कारवाई करण्यात आली असून गुन्हे दाखल करण्याची प्रक्रिया उशिरा रात्रीपर्यंत सुरू होती.