Monsoon Alert : अमरावती जिल्ह्यात आणि परिसरामध्ये मुसळधार पाऊस अजूनही सुरुच आहे. पावसामुळे जिल्ह्यातील नद्यांना पूरजन्य परिस्थिती निर्माण झाली आहे. जिल्ह्यातील शेकडो हेक्टरवरील पिके अक्षरशः पाण्याखाली गेली आहेत.

दुसरीकडे अमरावती शहरातील लालखडी परिसरातील अंबा नाल्यात एक मुलगा पुराच्या पाण्यामुळे वाहून गेला. मुसळधार पावसामुळे अमरावतीमधील अंबा नाल्याला पूर आल्याने ही दुर्घटना घडली.

१४ वर्षीय परवेज खान अफरोज खान असं पुरात वाहून गेलेल्या बालकाचं नाव आहे. घटनास्थळी रेस्क्यू पथक दाखल झालं असून नाल्यानजीक खेळायला गेलेला बालक अचानक नाल्यात पडला व तो वाहून गेला. घटनास्थळी नागरिकांची प्रचंड गर्दी झाली आहे. राष्ट्रवादी काँग्रेसचे नेते संजय खोडके घटनास्थळी दाखल झाले आहेत.

अमरावती जिल्ह्यात मुसळधार पाऊस

अमरावती जिल्ह्यात पावसाची तुफान बॅटिंग सुरु आहे. पूर्णानगर भागत शेकडोहेक्टरवरील पिके पाण्याखाली गेली आहेत. सोयाबीन, कपाशीसह तूर पिकालाही मोठा फटका बसला आहे. अनेक भागात पिकांना नवसंजीवनी तर दुसरीकडे पावसाने मोठ्या प्रमाणावर नुकसान केले आहे.

रविवारी (दि. १४ जुलै) रात्री राज्यातल्या अनेक जिल्ह्यात मुसळधार पावसाचा इशारा देण्यात आलेला आहे. यामध्ये नागपूर, वर्धा, अमरावती, अकोला, बुलढाणा, वाशिम, यवतमाळ, चंद्रपूर, भंडारा, गोंदिया, जळगाव, नाशिक, नगर, पुणे, सोलापूर, सातारा, सांगली, कोल्हापूर, बीड धाराशिवा, छत्रपती संभाजी नगर, जालना जिल्ह्यांना मुसळधार पावसाचा इशारा देण्यात आलेला आहे.