शेगाव : विठ्ठल माझा... मी विठ्ठलाचा... या अभंगाच्या गजरात व टाळ मृदंगाच्या निनादात खा. राहूल गांधी यांचे स्वागत करण्यात आले. एक हजार वारकऱ्यांच्या स्वागताने शेगाव तालुक्यातील वरखेड फाट्यावर आज विठ्ठल नामाची शाळा भरली. या स्वागताने राहुल गांधीही भारावून गेले.

भारत जोडो यात्रेचे संतनगरी शेगाव तालुक्यात आगमन झाले. श्रीसंत गजानन महाराज यांच्या पावनभूमीत काँग्रेसचे खा. राहुल गांधी यांचे शुक्रवारी सकाळी आगमन झाले. संतनगरीच्या सीमेवर वरखेड फाट्यावर त्यांचे स्वागत झाले. यावेळी डोळ्यांचे पारणे फेडणारा, तसेच वारकरी संप्रदायाची परंपरा जोपासणारा वारकरी रिंगण सोहळा पार पडला.

भारत जोडो यात्रेचे संत नगरीच्या सीमेवर आगमन होताच खा. राहुल गांधी यांना वारकरी संप्रदायाचे दर्शन घडले. एक हजार वारकरी आणि विद्यार्थ्यांनी रिंगण सोहळ्यात पाऊली खेळत टाळ मृदुंगाच्या गजरात व अभंगाच्या जयघोष करत राहुल गांधी यांचे आगळेवेगळे स्वागत केले. काँग्रेस नेते ज्ञानेश्वरदादा पाटील यांनी टोपी व दुपट्टा देऊन खासदार राहुल गांधी यांचे स्वागत केले.

समाधीपुढे नतमस्तक

शेगाव (जि.बुलडाणा) ः भारत जोडो यात्रेचे शुक्रवारी संतनगरी शेगाव येथे आगमन झाले. काँग्रेसचे नेते राहुल गांधी यांनी (ता. १८) येथील श्रीसंत गजानन महाराज मंदिरात श्रींचे दर्शन घेतले व त्यानंतर प्रसादालयात जाऊन महाप्रसाद घेतला.

वारकरी संप्रदायाची महती देश आणि जगभर पोहोचावी या उद्देशाने भारत जोडो यात्रेनिमित्त संत नगरी शेगाव येथे वरखेड फाट्यावर एक हजार वारकऱ्यांचा रिंगण सोहळा पार पडला. यावेळी अभंग व टाळ मृदंगाच्या गजरात राहुल गांधी यांचे स्वागत करण्यात आले.

- ज्ञानेश्वरदादा पाटील, काँग्रेस नेते