Nagpur Lok Sabha Election Result: नागपूर लोकसभा मतदारसंघामध्ये भारतीय जनता पक्षाचे नितीन गडकरी यांचा विजय झाला आहे. गडकरीच या मतदारसंघातून तिसऱ्यांदा बाजी मारतील असा अंदाज होता. त्याप्रमाणे ते जिंकले देखील आहेत. मात्र, एक गोष्ट नितीन गडकरी यांच्या मनासारखी घडली नाही. मतदार ५ लाखांपेक्षा अधिक मताधिक्यानी निवडून देतील असा दावा त्यांनी केला होता. पण, त्यांचे मताधिक्य याच्या जवळपास देखील नाही असं चित्र आहे.

नितीन गडकरी यांना ६,५५,०२७ मतं (५४.१ टक्के) मिळाली आहेत, तर विकास ठाकरे यांना ५,१७,४२४ (४२.७ टक्के ) मतं मिळाली आहेत. याचा अर्थ गडकरींनी फक्त १ लाख ३७ हजार मतांची आघाडी घेतली आहे. गेल्या लोकसभा निवडणुकीवेळी गडकरींना २ लाख १८ हजारांचं मताधिक्य होतं. त्यामुळे मताधिक्य वाढलं तर नाही त्यात घटच झाल्याचं स्पष्ट आहे.

२०१९ च्या लोकसभा निवडणुकीमध्ये काँग्रेसच्या नाना पटोले यांच्याविरोधात गडकरींची लढत झाली होती. या लढतीत काँग्रेसने चांगला जोर लावला होते, मात्र नितीन गडकरी पुन्हा निवडून आले. गडकरींना ६,५७,६२४ मतं मिळाली होती. त्यांचं मताधिक्य २ लाख १८ हजार मतांचं होतं. नाना पटोले यांना ४ लाखांपेक्षा जास्त मतं मिळाली होती. याचा अर्थ विकास ठाकरे यांनी नाना पटोले यांच्यापेक्षा जास्त मतं घेतली आहेत.

पूर्व विदर्भातील पाच लोकसभा मतदारसंघापैकी चार लोकसभा मतदारसंघामध्ये भाजपचा दारुण पराभव झाला आहे. केवळ नागपूरमध्ये भाजपला जागा कायम ठेवता आली. २०१९ मध्ये पूर्व विदर्भात नागपूर, भंडारा-गोंदिया, गडचिरोली-चिमूर या मतदारसंघात भाजपचे खासदार होते. रामटेकमध्ये शिवसेनेचा खासदार होता, तर चंद्रपूरमध्ये एकमेव काँग्रेसचा खासदार होता. यावेळी चित्र पूर्ण वेगळं आहे. नागपूरसोडून इतर चारही मतदारसंघामध्ये काँग्रेसचे उमेदवार विजयी झाले आहेत.

गडकरींसमोर विकास ठाकरे टिकणार नाहीत, असं चित्र निर्माण करण्यात आलं होतं. पण, ठाकरेंनी त्यांना चांगली टक्कर दिली आहे. देश पातळीवर केलेली विकासकामे आणि स्वच्छ प्रतिमा याचा ठाकरेंचा नक्कीच फायदा झालाय. पण, ठाकरेंना देखील चांगली मतं मिळाली आहेत. त्याचमुळे ठाकरे यांनी हा माझा नैतिक विजय आहे, असं म्हटलं असावं.