बुलडाणा : जिल्ह्यात अतिवृष्टी व पूर परिस्थितीमुळे पिकांचे अतोनात नुकसान झाले आहे. शेतकरी आर्थिक संकटात आहे. प्रशासनाने जाहीर केलेल्या जिल्ह्यातील एकूण १४२० गावांची अंतिम पीक पैसेवारी ६५ पैसे जाहीर झाली आहे..

१३४७ गावांची नजरअंदाज पीक पैसेवारी ५० पैसेचेवर तर केवळ ७३ गावांची नजरअंदाज पीक पैसेवारी ५० पेक्षा कमी निघाली. त्यामुळे ही नजर अंदाजवारी याच ७३ गावांना सध्यातरी दुष्काळ सदृश मानत आहे.जिल्ह्यात जून महिन्यात पावसाला सुरवात झाली अन शेतकऱ्यांचे नुकसान झाले. त्यानंतरही पावसामुळे नुकसानीने शेतकऱ्यांची पाठ सोडली नाही.

असे असताना शासनाकडून करण्यात येणारी नजर अंदाजवारी फक्त ७३ गावांमध्येच दुष्काळ असल्याचे दाखवत आहे. या पैसेवारीत फरक पडून दुष्काळग्रस्त गावांची संख्या वाढू शकते.अशा परिस्थितीत सुधारीत पैसेवारी कशी येते, याकडे शेतकऱ्यांच्या नजरा लागल्या होत्या. २०२४-२५ या खरीप हंगामातील जिल्ह्यातील एकूण १४२० गावांची अंतिम पीक पैसेवारी जाहीर झाली आहे. जाहीर झालेल्या पीक पैसेवारीनुसार जिल्ह्यातील १४२० गावापैकी १३४७ गावांची नजर अंदाज पीक पैसेवारी ५० पैसेचेवर तर ७३ गावांची नजर अंदाज पीक पैसेवारी ५० पैशांच्या आत जाहीर करण्यात आली आहे.

तालुकानिहाय अंतिम पीक पैसेवारी

बुलडाणातील ९८ गावांची अंतिम पीक पैसेवारी ७२, चिखली तालुकात १४४ गावांची पैसेवारी ७०, देऊळगाव राजा ६४ गावांची पैसेवारी ७२, मेहकर १६१ गावांची पैसेवारी ७२, लोणार ९१ गावांची पैसेवारी ६२, सिं. राजा ११४ गावांची पैसेवारी ६८, मलकापूर ७३ गावांची पैसेवारी ६७, मोताळा १२० गावांची पैसेवारी ६१, नांदुरा ११२ गावांची पैसेवारी ६५, खामगांव १४६ गावांची पैसेवारी ५३, जळगांव जामोद ११९ गावांची पैसेवारी ५५ पैसे आणि संग्रामपूर १०५ गावांची अंतिम पीक पैसेवारी ७३ आहे.

शेगाव तालुका दुष्काळाच्या छायेत

शेगावमधील ७३ गावांची ४७ पैसेवारी जाहीर झाली आहे. जिल्ह्याची एकूण १४२० गावांची अंतिम पीक पैसेवारी ६५ पैसे जाहीर झाली आहे, असे जिल्हाधिकारी कार्यालयाने कळविले आहे. त्यामुळे शेगाव तालुका दुष्काळाच्या छायेत असल्याचे पैसवारीतून स्पष्ट होत आहे.