आरमोरी (जि. गडचिरोली) : आरमोरी येथे गेल्या तीन महिन्यांपासून धानखरेदी केंद्र सुरू होते. परंतु सर्व गोदामे धान्याने परिपूर्ण भरलेली असल्याने बुधवार (ता. 17) पासून येथील धानखरेदी केंद्र पूर्णत: बंद झाले आहे. शिवाय बरेच धान उघड्यावर असून सध्या वातावरणात बदल झाल्याने अवकाळी पावसामुळे हे धान सडत आहेत. त्यामुळे गोदामांची तत्काळ व्यवस्था करण्यात यावी, अशी मागणी परिसरातील शेतकऱ्यांनी केली आहे.
सविस्तर वृत्त असे की, आरमोरी तालुक्‍यातील धान उत्पादक शेतकरी हे गेल्या तीन महिन्यापासून धान विक्री करण्यासाठी आपापले नंबर लावून वाट पाहत होते आणि जवळपास तीन ते चार गोदाम पूर्णत: खरेदी करून फुल्ल झाले आहेत. त्यामुळे अजून बरेच शेतकरी धानविक्रीपासून वंचित राहणार आहेत. त्यासाठी आरमोरी तालुक्‍यामध्ये धानाची खरेदी करण्यासाठी खरेदी-विक्री समितीकडे स्वतःचे गोदाम नसल्याने तसेच शासकीय गोदाम उपलब्ध न झाल्यामुळे कृषी उत्पन्न बाजार समितीच्या आवारात जवळपास तीस ट्रॅक्‍टर भरून असलेले धान उघड्यावर ठेवले आहेत.
अवेळी येणाऱ्या पावसामध्ये हे धान सडत आहेत. बुधवारी जवळपास तीन वाजेपासून आरमोरी तालुक्‍यात मुसळधार पाऊस सुरू झाला त्यामुळे कृषी उत्पन्न बाजार समितीच्या आवारामध्ये आणलेले शेतकऱ्यांचे धान पूर्णत: पावसामुळे ओले झाले आहेत. परंतु अजूनपर्यंत शासनाने गोदामांची व्यवस्था न केल्याने या धान उत्पादक शेतकऱ्यांवर संकट ओढवले आहे.
अशा स्थितीत जिल्हाधिकाऱ्यांनी सर्व शेतकऱ्यांचे धान खरेदी करण्याच्या दृष्टीने आरमोरी परिसरात धान विक्री करिता खरेदी विक्री समितीला खरेदी करण्यासाठी तात्काळ गोदामांची व्यवस्था करण्यात यावी, अशी मागणी या परिसरातील शेतकऱ्यांनी जिल्हाधिकारी दीपक सिंगला, खासदार अशोक नेते, आमदार कृष्णा गजबे, तहसीलदार कल्याणकुमार डहाट तसेच खरेदी विक्री समिती, गडचिरोलीचे अधिकारी यांच्याकडे निवेदनाद्वारे केली आहे. हे निवेदन तहसीलदारांच्या मदतीने जिल्हाधिकारी, गडचिरोली यांना पाठवण्यात आले आहे.
हेही वाचा - मंत्री पुत्राच्या लग्नात पेट्रोल-डिझेल, गॅस सिलिंडरची भेट; युवक कॉंग्रेसकडून केंद्र सरकारचा निषेध
व्यवस्था होताच होणार खरेदी...
धान गोदाम उपलब्ध करून देण्याच्या दृष्टीने खरेदी-विक्री समितीचे अध्यक्ष महेंद्र मने यांना विचारणा केली असता आमच्याजवळ गोदाम उपलब्ध नसल्याने धान खरेदी करू शकत नाही, असे त्यांनी सांगितले. गोदामांची व्यवस्था झाल्याबरोबर आम्ही धान खरेदीला सुरुवात करू. त्यासाठी सरकारने आम्हाला गोदामांची व्यवस्था करून द्यावी, अशी मागणीसुद्धा समितीचे अध्यक्ष महेंद्र मने यांनी केली आहे.
संपादन - अथर्व महांकाळ
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.