Sharad Pawar: सुप्रिया सुळे यांना अध्यक्ष करुन भाजपसोबत जाण्याचा डाव होता, असा आरोप काल (बुधवार) छगन भुजबळ यांनी केला. सात वेळा यावर चर्चा झाली होती. या प्रकरणावर राष्ट्रवादी काँग्रेसचे अध्यक्ष शरद पवार यांना प्रश्न विचारण्यात आला. शरद पवार अकोल्यात पत्रकार परिषदेत बोलत होते.

शरद पवार म्हणाले, काही लोकांचा आग्रह होता ही गोष्ट खरी आहे. सुप्रिया सुळे यांना अध्यक्ष करा हा प्रस्ताव छगन भुजबळ यांचा होता. पण तो स्विकारला नाही. न स्विकारण्यामागे कारणही होत कारण त्याच्या पुढची स्टेप (भाजप सोबत जाण्याची) आम्हाला मान्य नव्हती.

छगन भुजबळांना महत्व देऊ नका. त्यांनी काहीही सांगितलं तरी हा प्रस्ताव आमचा नव्हता. सुप्रिया सुळे यांचा देखील नव्हता, असे पवार म्हणाले.  

ही लोक भाजपसोबत जाणार होती म्हणून शरद पवार यांनी नाराज होऊन अध्यक्षपदाचा राजीनामा दिला होता, असे सुप्रिया सुळे म्हणाल्या होत्या. यावर शरद पवार म्हणाले, भाजपसोबत जायला आमची संमती नव्हती. खोटं बोलून भुजबळ शपथविधीला गेले असं देखील काल त्यांनी स्पष्ट केलं आहे.

काय म्हणाले छगन भुजबळ?

ज्या दिवशी अजित पवारांनी बंड करुन मंत्रिपदाची शपथ घेतली त्या दिवशी आपण लोणावळ्याला आहे, असं खोटं सांगितल्याची कबुली छगन भुजबळ यांनी काल (बुधवार) दिली.