नागपूर : मुख्यमंत्री देवेंद्र फडणवीस यांचे शहर.. संपूर्ण देशात पायाभूत सुविधांच्या विकासाचा धडाका लावणार्‍या नितीन गडकरी यांचे शहर.. आणि राष्ट्रीय स्वयंसेवक संघाचे मुख्यालय असलेले शहर म्हणजे नागपूर! मेट्रो सिटी, स्मार्ट सिटीकडे नागपूरची वेगाने वाटचाल सुरू आहे, असे सतत सांगितले जाते. पण शहरातील सार्वजनिक वाहतूक व्यवस्थेची अवस्था काय आहे?

केंद्र सरकारच्या 'जे एनएनयूआरएम' योजनेंतर्गत नागपूरच्या सार्वजनिक वाहतूक व्यवस्थेसाठी 'स्टार बस' मिळाल्या आहेत. शहराची वाहतूक या बसच्या भरवशावर सुरू आहे. पण याच बस व्यवस्थेची दुरावस्था झाली आहे.

शहरातील हिंगणा मार्गावर धावत असलेली बस अक्षरश: एका बाजूने झुकलेली आहे. प्रवाशांच्या सुरक्षेचा विचार न करता स्टार बसचे प्रशासन याच गाड्या रस्त्यावर धाडत आहे. अशा परिस्थितीत एखादा अपघात झाला, तर जबाबदार कोण?