यवतमाळ - कोरोनाचे रुग्ण वाढत असल्याने यवतमाळ जिल्ह्यात आजपासून संचारबंदी सुरू झाली आहे. दरम्यान, मंगल कार्यालयातील गर्दीचा आढावा घेत असताना लग्न सोहळ्यात पोहोचलेल्या जिल्हाधिकारी एम. देवेंदर सिंह व जिल्हा पोलिस अधीक्षक डॉ. दिलीप पाटील भुजबळ यांनी नववधू-वराना शुभेच्छा तर दिल्याच, शिवाय त्यांना संचारबंदीच्या नियमांचे पालन करण्याचे, मास्क व सॅनिटायझर वापरण्याचे आवाहन केले. 

संचारबंदी लागल्यापासून जिल्हाधिकारी सिंह स्वतः फिल्डवर आहेत. नागरिकांना गर्दी न करण्याचे, मास्क व सॅनिटायझर वापरण्याबाबत ते प्रत्यक्ष आवाहन करीत आहेत. पहिल्या कोरोना सत्रात सिंह यांनी उत्कृष्ठ कामगिरी केली आहे. आताही ते प्रत्यक्ष फिल्डवर दिसताहेत. संचारबंदी लागू झाल्यामुळे शाळा, महाविद्यालयात व मंगल कार्यालयात गर्दी होणार नाही, याची काळजी घेण्याचे शासनाचे आदेश आहेत. तसेच 50 पेक्षा जास्त वऱ्हाडी असल्यास मंगल कार्यालयावर कारवाई करण्याचे कडक निर्देश आहेत. आज, शनिवारी, रात्री जिल्हाधिकारी सिंह व पोलीस अधीक्षक डॉ. पाटील भुजबळ यांनी येथील आर्णी मार्गावरील पल्लवी लॉनला भेट दिली. तेथे चि. प्रशांत व चि. सौ. का. रितेश्विनी यांचा मंगल परिणय सोहळा सुरू होता.

- ताज्या बातम्यांसाठी डाऊनलोड करा ई-सकाळचे ऍप

नातेवाईक, आप्तेष्ट शुभेच्छा देत होते. काही काळ थांबून स्वतः जिल्हाधिकारी सिंह व डॉ पाटील भुजबळ यांनी नववधू-वरास भावी जीवनाच्या शुभेच्छा दिल्या. त्यांना कोरोनापासून स्वतःचे संरक्षण कसे करावे याबद्दल सांगितले. मास्क व सॅनिटायझर -वापरण्याचे आवाहन केले. स्वतः जिल्ह्याचे दोन्ही उच्चपदस्थ अधिकारी लग्न सोहळ्यात आल्यामुळे आता काय कारवाई होते, या काळजीत पडलेल्या नवरी-नवरदेवांच्या डोक्यावर आशीर्वादाच्या अक्षदा पडताच त्यांनी आभार मानत कृतज्ञ झाल्याची भावना व्यक्त केली. 

व्यवस्थापकाना केल्या सूचना
जिल्‍हाधिकारी एम. देवेंदर सिंह व जिल्हा पोलीस अधीक्षक डॉक्टर दिलीप भुजबळ पाटील यांनी शनिवार रात्री येथील पल्लवी लॉनला भेट दिली. यावेळी त्यांनी व्यवस्थापकाना बोलावून त्यांना संचारबंदीच्या नियमांचे काटेकोर पालन करण्याचे आवाहन केले.

Edited By - Prashant Patil