अमरावती : यवतमाळ जिल्ह्यातील पहुर येथील पतीच्या हत्येप्रकरणी आधी दत्तापूर पोलिसांनी दाखल केलेला हत्येचा गुन्हा यवतमाळ जिल्ह्यातील बाभूळगाव पोलिसांकडे वर्ग करण्यात आला आहे. यात मृत व्यक्तीची अटक पत्नी व तिचा मित्र अशा दोघांना धामणगावरेल्वे न्यायालयाने न्यायालयीन कोठडी सुनावली. त्यामुळे दोघा संशयितांची रवानगी मध्यवर्ती कारागृहात झाली. गंगा गजानन राठोड (वय ३५, रा. पहुर, जि. यवतमाळ) व सचिन श्रावण राठोड (वय ३०, रा. वीरगव्हाण) अशी हत्येच्या गुन्ह्यातील अटक संशयितांची नावे आहेत.

त्या दोघांवर गजानन नथ्थूजी राठोड (वय ४०, रा. पहुर) यांची संगनमताने हत्या केल्याचा आरोप आहे. गुरुवारी (ता. २०) रात्री ही घटना यवतमाळ जिल्ह्यातील पहूर गावात घडली होती. घरातच गजानन याचा गळा आवळून हत्या केली. त्यानंतर एका ब्लँकेटमध्ये गुंडाळून गजानन राठोड याचा मृतदेह संशयित सचिन राठोड याने सदर गाठोडे धावमणगावरेल्वे रेल्वेलाईनवर आणून फेकले होते. शुक्रवारी (ता. २१) ही घटना उघडकीस आल्यानंतर दत्तापूर पोलिसांनी हत्येचा गुन्हा दाखल केला होता.

त्या दोघांना अटक करून शनिवारी (ता. २२) सायंकाळी धामणगावरेल्वे येथील विशेष न्यायालयासमोर हजर केले होते. घटनास्थळ हे यवतमाळ जिल्ह्यातील बाभूळगाव पोलिस ठाण्याच्या हद्दीत येत असल्याने सदर गुन्हा दत्तापूर पोलिसांनी पुढील तपासकरिता यवतमाळ पोलिसांकडे वर्ग केला. अशी माहिती दत्तापुरचे ठाणेदार नितीन देशमुख यांनी दिली. सोमवारी (ता. २४) यवतमाळ पोलिस अमरावती कारागृहातून दोघाही संशयितांना ताब्यात घेतील, असे ही ठाणेदार देशमुख यांनी सांगितले.

हत्येचा प्रकार उघडकीस आल्याने तातडीने दत्तापूर पोलिसांनी आवश्यक ती कायदेशीर कारवाई केली. परंतु घटनेला पहुर येथून सुरवात झाल्याने गुन्हा यवतमाळ पोलिसांकडे वर्ग करण्यात आला.

-नितीन देशमुख, ठाणेदार, दत्तापूर पोलिस ठाणे, जि. अमरावती.