नवेगावबांध ( जि. गोंदिया) : गळ्यातील ओढणी पीठ गिरणीच्या पट्ट्यात अडकली. त्यामुळे महिलेचे डोके धडापासून वेगळे होऊन सदर महिलेचा जागीच मृत्यू झाला. ही घटना शुक्रवारी ( ता. २८) सायंकाळी ४.३० च्या सुमारास आझाद चौकातील हर्षल उजवणे यांच्या पीठ गिरणीत घडली.

नीतू हर्षल उजवणे(वय ४६, रा. नवेगावबांध) असे मृत महिलेचे नाव आहे. येथील आझाद चौकात हर्षल उजवणे यांची पीठ गिरणी आहे. शुक्रवारी सायंकाळी ४.३० च्या सुमारास त्यांच्या पत्नी नीतू या नेहमीप्रमाणे गिरणीवर दळण दळत असताना त्यांच्या गळ्यातील ओढणी गिरणीच्या पट्ट्यात अडकली.

त्यामुळे त्यांचे डोके पीठ गिरणीच्या चाकात अडकले आणि क्षर्णाधात धडापासून वेगळे झाले. यात त्यांचा जागीच मृत्यू झाला. नीतू यांच्या निधनाने गावात हळहळ व्यक्त केली जात आहे. घटनेची माहिती वाऱ्यासारखी गावात पसरली त्यामुळे गिरणी परिसर व रस्त्यावर मोठी गर्दी झाली होती.

घटनेची माहिती मिळताच येथील पोलिस ठाण्याच्या ठाणेदार योगिता चाफले आपल्या ताफ्यासह घटनास्थळी दाखल झाल्या. पोलिसांनी पंचनामा करून मृतदेह उत्तरीय तपासणीसाठी ग्रामीण रुग्णालय नवेगावबांध येथे पाठविला आहे.