हिवरा आश्रम : यावर्षी समाधानकारक पाऊस झाल्यामुळे धरण, विहिरीच्या जलपातळीत वाढ झाली. शेतीसाठी सिंचनाच्या सोयी उपलब्ध असल्यामुळे अनेक शेतकरी भाजीपाला पिकाकडे वळल्याचे विधायक चित्र हिवरा आश्रम परिसरात दिसून येत आहे. हिवरा आश्रम परिसरातील शेतकऱ्‍यांनी कांदा पिकाची मोठया प्रमाणात लागवड केली. कांदा हे पिक भाजी वर्गीय असून व्यापारीदृष्ट्या या पिकाला चांगले महत्व आहे.

सद्या कांदा पिक ऐन जोमात असताना या पिकावर अळी व किडीचा मोठया प्रमाणात प्रादुर्भाव झाला आहे. कांदा पिकावर ऐन पिक जोमात असताना आळी पडल्यामुळे शेतकरी हवादिल झाला आहे. कांदा पिकावरील अळीचे नियत्रंण करण्यासाठी त्यांची धावपळ दिसून येत आहे. यावर्षी अगोदरच शेतीचे संपूर्ण अर्थकारण बिघडल्यामुळे शेतकऱ्‍यांवर आर्थिक संकट ओढवले आहे. अगोदरच खरिपात शेतकऱ्‍यांच्या मूग, उडीद पिकांचे नुकसान झाले. तर सप्टेंबर व ऑक्टोंबर महिन्यामध्ये अतिवृष्टी व परतीच्या पावसाने सोयाबीन पिकाचे मोठे नुकसान झाले. अतिवृष्टी पावसाच्या खरिपातील पिकाला फटका बसल्यामुळे सोयाबीनच्या उत्पादनात मोठ्या प्रमाणात घट झाली.

आता रब्बीच्या पिकावर शेतकऱ्‍यांची भिस्त असताना कांदा पिकावर अळीचा प्रादुर्भाव झाल्यामुळे उत्पादन घटीमुळे शेतकरी चिंताग्रस्त झाल्याचे दिसून येत आहे. सद्या कांदा पिकावर किडीचा व अळीचा प्रादुर्भाव मोठया प्रमाणात दिसून येत असून शेतकरी वर्ग चिंताग्रस्त झाला आहे. कांदा पिकावर महागडी औषधांची फवारणी करून कांदा पिक वाचविण्यासाठी बळीराजाचे प्रयत्न सुरू आहे.

ढगाळ वातावरणामुळे पिके धोक्यात

ढगाळ वातावरणामुळे कांदा पिकावर मोठया प्रमाणात अळी व किडींचा प्रादुर्भाव झाला आहे. कांदा पिकावर अळी व किडीचा प्रादुर्भाव झाल्यामुळे शेतकरी मोठ्या आर्थिक अडचणीत सापडला आहे. पिकांवर कीड व अळीचा प्रादुर्भाव झाल्यामुळे पिकांचे नुकसान होऊन रब्बीचे पिके धोक्यात आली आहे.

३ एकरांमध्ये कांदा लागवड केली आहे. कांदा पिक जोमात होते. मात्र गेल्या काही दिवसापासून ढगाळ वातावरणामुळे कांदा पिकावर अळीचा व फुलकिडीचा प्रादुर्भाव झाला आहे. यामुळे कांदा पिकाचे नुकसान होत असून उत्पादनात घट होण्याची शक्यता आहे.

- शरद देशमुख,कांदा उत्पादक शेतकरी, दुधा