अकोला : आठवडाभरात तुरीच्या दरात हळूहळू वाढ होऊन प्रतिक्विंटल १२ हजारावर भाव अकोला कृषी उत्पन्न बाजार समितीमध्ये शेतकऱ्यांना मिळत आहे. पुढे अजूनही भाववाढीची शक्यता व्यापारी वर्गाकडून व्यक्त करण्यात आल्याने तूर उत्पादकांना एकप्रकारे दिलासा मिळाला आहे.

यावर्षी तुरीचे उत्पादन काही प्रमाणात घसरल्याचे चित्र आहे. मागणी अधिक असल्याने व आवक कमी असल्याने यंदा बाजारात तुरीला चांगले भाव मिळतील अशी तूर उत्पादक शेतकऱ्यांना अपेक्षा होती.

केंद्र सरकारने २०२२-२३ करीता जाहीर केलेल्या किमान आधारभूत किमतीनुसार ३०० रुपयांची वाढ देत तुरीला प्रतिक्विंटल ६६०० रुपये दर जाहीर केला. मात्र, आजपर्यंत एकाही वर्षी शासनाने शेतकऱ्यांच्या ५० टक्के सुद्धा तुरीची खरेदी केलेली नाही. शिवाय खते, बियाणे, मजुरी, एकंदरीतच उत्पादन खर्चात झालेली वाढ लक्षात घेता तूर उत्पादक शेतकऱ्यांना प्रतिक्विंटल आठ ते दहा हजार रुपये भावाची अपेक्षा होती.

गेल्या हंगामात तुरीचा पेराही वाढला होता. मात्र, वातावरणातील बदलाचा परिणाम होऊन अपेक्षित उत्पादन होऊ शकले नाही. परिणामी मागणी अधिक व आवक कमी अशी स्थिती निर्माण झाल्याने कृषी उत्पन्न बाजार समितीमध्ये सुद्धा सुरुवातीपासूनच सहा हजाराहून अधिक दर तुरीला मिळाले.

हळूहळू त्यामध्ये वाढ होत जाऊन, एप्रिलमध्ये ८८०० रुपयांपर्यंत भाव मिळाला. मे मध्ये मात्र ३०० ते ४०० रुपयांनी भाव वधारले असून, शुक्रवारी (ता.२९) अकोला कृषी उत्पन्न बाजार समितीमध्ये प्रतिक्विंटल १२०० रुपयांपर्यंत भाव मिळाला. तुरीच्या भावात अजूनही वाढ होण्याची शक्यता व्यापारी वर्गाकडून व्यक्त करण्यात आल्याने तुरीला अच्छे दिन आल्याची परिस्थिती आहे.

सरासरी ८२०० रुपये भाव

गत तीन ते चार आठवड्यात तुरीचे भाव वधारले असून, मे च्या सुरुवातीपासूनच कमाल ९२०० रुपयांपर्यंत भाव अकोला कृषी उत्पन्न बाजार समितीमध्ये मिळत आहे. त्यामध्ये कमाल ६४५० रुपये भाव मिळाला असून, सरासरी ८२०० रुपये प्रतिक्विंटल भाव शेतकऱ्यांच्या तुरीला प्राप्त होत आहे.

अकोला बाजार समितीत आठवड्याभरातील तुरीचा भाव

तारीख भाव (प्रती क्विंटल)

२ मे ६००० ते ९०००

३ मे ५००० ते ९०००

४ मे ७२०० ते ९१००

६ मे ७००० ते ९२५५

८ मे ६२०० ते ८९९५

९ मे ६६०५ ते ८८०५

१० मे ६००० ते ९२५०

११ मे ६४५० ते ९१००