Gadchiroli :सर्पदंश झाल्यामुळे अत्यवस्थ अवस्थेत असलेल्या मुलीला उपचारासाठी दुचाकीवर घेऊन निघालेल्या राकेश किरंगे (वय २७) या तरुणाला मोटारीची जोरदार धडक बसली. या अपघातात त्याचा मृत्यू झाला व इतर दोघे जखमी झाले. ही घटना शनिवारी (ता.१०) गडचिरोलीजवळ घडली.

रानमूस येथील एका मुलीला साप चावला होता. ही मुलगी राकेशची नातलग आहे. तिचे प्राण वाचावे म्हणून तो दुचाकीवरून गडचिरोली येथे जिल्हा सामान्य रुग्णालय उपचारासाठी तिला नेत होता. यावेळी मोटारीची धडक दुचाकीला बसली.

ही धडक एवढी जबरदस्त होती की दुचाकीचे पुढचे चाक निखळून पडले आणि मोटारीच्या पुढच्या भागाचा चेदामेंदा झाला. यात राकेशचा जागीच मृत्यू झाला. पण त्याच्या दुचाकीवर बसलेली महिला व सर्पदंश झालेली मुलगी दोघेही सुदैवाने वाचले आहेत. शिवाय मोटारीमधील गोरे परिवाराचे सदस्यही बचावले.