अमरावती  : सोशल मीडियावर फोटो व्हायरल करून बदनामी करण्याची धमकी देऊन विवाहितेला साडेतीन लाखांची खंडणी मागणाऱ्या तीन विद्यार्थ्यांविरुद्ध अंजनगावसुर्जी पोलिसांनी खंडणीचा गुन्हा दाखल केला. 

आदित्य पाटील, प्रज्ज्वल भाष्कर व आदित्य अस्वार अशी त्या युवकाची नावे असल्याचे पोलिसांनी सांगितले. या युवकांनी एका विवाहित महिलेच्या मोबाईलवर 8 जून रोजी पहिल्यांदा संपर्क साधला. महिलेचे काही फोटो उपलब्ध असून, ते फोटो सोशल मीडियावर व्हायरल करून बदनामी करण्याची धमकी दिली. बदनामीपासून वाचायचे असेल तर, तीन लाख पन्नास हजार रुपयांची खंडणी द्यावी लागेल, अशी मागणी केली. या संदर्भात कुणालाही माहिती दिल्यास विवाहितेसह तिच्या पतीला जीवाने मारण्याची धमकी दिली. तक्रार करणाऱ्या महिलेस ठरलेल्या ठिकाणी शुक्रवारी (ता. 12) मध्यरात्री एका दुचाकीवर पैशाची थैली ठेवण्यास सांगितले होते. थैली ठेवल्यानंतर दुचाकी घेऊन काहीजण निघाले. तक्रारकर्त्याने त्यांचा पाठलाग केला. संशय आल्याने ते दुचाकी सोडून पळाले. तीन मोबाईल क्रमांकावरून त्यांनी महिलेशी संपर्क साधला होता. तीन ते चार दिवस तणावात असलेल्या महिलेने अखेर अंजनगावसुर्जी ठाण्यात तक्रार दाखल केली. प्रकरणी पोलिसांनी तिघांविरुद्ध गुन्हा दाखल केला. 

अवश्य वाचा- अरे व्वा! प्राण्यांसाठीही दररोजचा मेन्यू; लॉकडाउनमध्ये शमविली त्यांनी प्राण्यांची भूक 

व्हाट्‌सऍप केले हॅक 

खंडणी मागणारे तिघेही विद्यार्थी असून त्यापैकी एकाने विवाहितेचे व्हॉट्‌सऍप अकाउंट हॅक केले. त्यातून त्या महिलेचे काही पर्सनल फोटो प्राप्त करून हा कट रचला. त्यासाठी मुख्य सूत्रधारांनी आपल्या मित्रांच्या मोबाईलचा वापर केला, असे पोलिस अधिकाऱ्यांनी सांगितले. अमरावती अंजनगावसूर्जी खंडणी

तीनही विद्यार्थ्यांना अटक झाली असून, न्यायालयाने त्यांना सोमवारपर्यंत (ता.15) पोलिस कोठडीत ठेवण्याचे आदेश दिले होते. ज्या मोबाईलचा त्यांनी गुन्ह्यात वापर केला ते जप्त केल्या जातील.  
- राजेश जावरे, पोलिस उपनिरीक्षक, अंजनगावसुर्जी.