वानाडोंगरी - 'बेटी बचाओ,  बेटी पढाओ’ असा सर्वत्र नारा गाजत असताना या कडाक्‍याच्या थंडीत शासनाच्या भरवशावर स्वतःच्या मायबापांना व घरादारांना सोडून शिक्षणासाठी आलेल्या या सावित्रीच्या लेकी थंडीमुळे बेजार झालेल्या आहेत. अनुसूचित जाती व नवबौद्ध मुलींची शासकीय निवासी शाळेच्या वस्‍तीगृहात खिडक्‍यांना चादरी बांधून रात्रभर थंडीत झोपून दिवस निघण्याची वाट बघतात.

शासकीय औद्योगिक प्रशिक्षण संस्थेसमोर नव्याने तयार झालेल्या निकृष्ट दर्जाच्या इमारतीमध्ये अनुसूचित जाती व नवबौद्ध मुलींची शासकीय निवासी शाळा सुरू झाली आहे. परंतु, त्या निवासी वसतिगृहातील खिडक्‍यांना तावदाने नाहीत. अनुसूचित जाती व नवबौद्ध मुलींची शासकीय निवासी शाळा सन-२०११ मध्येच सुरू होणे गरजेचे होते. पण, पुरेशी व्यवस्था नसतानाही समाजकल्याणमंत्र्यांच्या आग्रहाखातर जून महिन्यात सुरू होणारी शाळा ऑक्‍टोबर २०१८ मध्ये सुरू करण्यात आली. 

सध्या एकूण १७ मुली शिक्षण घेत आहेत. निवासी वसतिगृहात खोल्यांना दारं आहेत. पण, दारांना कड्या नाहीत. संपूर्ण खिडक्‍यांना तावदाने नाहीत. मैदानावर काटेरी झाडे झुडपी वाढलेली आहेत. सरपटणारे  प्राणी कधीही आत शिरू शकतात. पुरेशी सुरक्षा व्यवस्था व साधनसामग्रीची गरज आहे. तेव्हा संबंधित अधिकारी व पदाधिकाऱ्यांनी दखल घेऊन निवासी मुलींना त्रास होणार नाही, याची  काळजी घेण्याची मागणी होत आहे.

वसतिगृहाचे बांधकाम निकृष्ट
‘शासकीय काम आणि घडीभर थांब’ या वसतिगृह व शाळेच्या इमारतीच्या बांधकामाची जबाबदारी महाराष्ट्र शासनाच्या सार्वजनिक बांधकाम विभागाकडे आहे. निवासी वसतिगृहातील बांधकाम हे अतिशय निकृष्ट दर्जाचे आहे. भिंतीवर एक खिळा जरी ठोकला तर भरभर वाळू सांडते. ही इमारत या निकृष्ट दर्जामुळे आजपर्यंत हस्तांतरित झाली नाही.

या समस्यांची माहिती संबंधित अधिकाऱ्यांना दिलेली आहे. ते तातडीने पूर्ण करणार आहेत.
- स्नेहल शंभरकर, मुख्याध्यापिका