चंद्रपूर : पैसे, इस्टेटीपेक्षा रक्‍ताचे नाते पातळ असते, याची उदाहरणे आपण अनेकदा समाजात बघतो. पैशासाठी अनेक जवळची नाती कोर्टाची पायरी चढतात. आणि अनेकदा एकमेकांच्या जीवावरही उठतात. अशीच घटना नुकतीच चंद्रपूर जिल्ह्यात घडली. आजीच्या नावावर असलेली शेती आपल्या नावावर करून द्यावी, या कारणावरून नातवाचा आजीशी वाद होता. 24 जूनला याच कारणाने आजी-नातवात वाद झाला. रागाच्या भरात नातवाने लाकडी दांड्याने आजीवर हल्ला चढविला. यात आजीचा मृत्यू झाला. ही घटना तालुक्‍यातील परसोडा येथे घडली. लहानाबाई हरिदास उईके (वय 75) असे मृत आजीचे, तर प्रशांत लक्ष्मण उईके (वय 35) असे नातवाचे नाव आहे.

परसोडा येथे लहानाबाई उईके राहत होत्या. त्यांच्या नावावर 15 एकर शेतजमीन आहे. त्यातील तीन एकर जमीन काही दिवसांपूर्वी विकण्यात आली. उर्वरित जमीन आपल्या नावावर करून देण्याच्या मागणीसाठी नातू प्रशांत उईके हा आजीकडे तगादा लावत होता. एवढेच नाही, तर याच कारणाने त्याने आजीला मारहाण सुद्धा केली आहे.

24 जूनला नातू प्रशांत याने याच कारणावरून आजी लहानाबाई उईके हिच्याशी वाद घातला. रागाच्या भरात प्रशांतने आजीवर लाकडी दांड्याने हल्ला चढविला. या हल्ल्यात आजी गंभीररीत्या जखमी झाली. परंतु, तिला उपचारार्थ दाखल केले नाही. त्यामुळे आजीचा मृत्यू झाला.
या घटनेची तक्रार गावचे पोलिस पाटील यांनी वरोरा पोलिस ठाण्यात केली. त्यानंतर पोलिसांनी घटनास्थळ गाठून पंचनामा केला.

सविस्तर वाचा - शाळा सुरू पण घंटा वाजणार नाही

मृतदेह उत्तरीय तपासणीसाठी उपजिल्हा रुग्णालयात पाठविला. नातू प्रशांत उईके याला अटक करून त्याच्याविरुद्ध विविध कलमान्वये गुन्हा दाखल केला. पुढील तपास पोलिस उपविभागीय अधिकारी डॉ. नीलेश पांडे यांच्या मार्गदर्शनात पोलिस निरीक्षक उमेश पाटील करीत आहेत.