वर्धाः  जिल्ह्यातील हिंगणघाट येथे एकतर्फी प्रेमातून दुर्दैवी घटना घडली. या घटनेनंतर आरोपीच्या आईने पीडित तरूणीला भेटणार असल्याची प्रतिक्रिया एका वृत्तवाहिनीशी बोलताना दिली आहे.

आरोपी विकेशची आई म्हणाली, त्या तरूणीसोबत जे झाले ते चूक आहे. शेवटी ती ही कोणाची तरी लेक आहे.विकेशच्या आईने आपल्या सुनेकडे पाहून ती ही कोणाची तरी सून आहे, अशी प्रतिक्रिया व्यक्त केली आहे.आरोपी विकेशच्या आईने पीडित तरूणीला रूग्णालयातून बरी होऊन आल्यावर नक्कीच भेटायला जाईन, असे सांगितले आहे.

हिंगणघाट येथे घडलेली घटना एकतर्फी प्रेमातून घडली. आरोपी विकेश हा विवाहित असूनही एकतर्फी प्रेमातून त्याने भररस्त्यात प्राध्यापक तरूणीवर पेट्रोल ओतून तिला जिवंत जाळण्याचा प्रयत्न केला. यात ती तरूणी गंभीर जखमी झाली. तिच्या त्वचेवर आणि श्वसनप्रक्रियेवर परिणाम झाला असल्याची माहिती डॉक्टरांनी दिली आहे. 

आरोपी विकेश आणि पीडित तरूणी यांची दहावीपासून ओळख होती. तसेच दोन्ही कुटुंबातील पालकांमध्येही चांगले संबंध होते. विकेशची तिच्यासोबत लग्न करण्याची इच्छा होती परंतू तसे झाले नाही.त्यानंतर स्वेच्छेने त्याने प्रियासोबत एप्रिल 2019 मध्ये विवाह केला. त्यांना दहा दिवसांची मुलगीही आहे.

आरोपीच्या घरातील लोकांनी सांगितल्याप्रमाणे घटनेच्या आदल्या दिवशी विकेश खूप तणावात होता. रात्रभर तो झोपला नाही. पहाटे कोणालाही न सांगता तो घरातून निघून गेला. त्याची पत्नी प्रियाच्या मते त्याचे आता इतर कोणत्याही तरूणीशी काहीच संबंध नाही असे त्याने सांगितलेले होते.

पण ज्या दिवशी तो घरातून निघून गेला त्या दिवशी दुपारी घरी पोलिस त्याला शोधत आले आणि तेव्हा त्याने असा गुन्हा केल्याचे सर्वांना कळले.