अमरावती  : कोरोना विषाणूचा प्रादुर्भाव टाळण्यासाठी दोन प्रवाशांमध्ये सुरक्षित अंतर ठेवण्याचा निर्णय राज्य मार्ग परिवहन महामंडळाने घेतला आहे. नवीन निर्णयानुसार एसटी बसच्या एका सीटवर दोन प्रवाशांना बसण्याची व्यवस्था असतानाही आता एका सीटवर केवळ एकाच प्रवाशाला बसून प्रवास करावा लागणार आहे. 

कोरोनासारख्या महाभयंकर विषाणूच्या प्रादुर्भावापासून जनतेचे रक्षण करण्यासाठी सर्व सरकारी, निमसरकारी आणि खासगी संस्था कामाला लागल्या आहेत. सगळीकडे जनजागृती करण्यात येत आहे. एसटी महामंडळाने सुद्धा कोरोनाविरुद्धच्या या युद्धात उतरून प्रवाशांच्या सुरक्षेसाठी काही विशेष निर्णय घेतले आहेत. या निर्णयानुसार एसटी बसमधून प्रवास करताना प्रवाशाला एका सीटवर आता एकट्यालाच बसावे लागणार आहे. वाहकाच्या बाजूच्या सीटवर कोणी बसणार नाही, तर त्याच्या पाठीमागच्या सीटवर वाहकाच्या विरुद्ध दिशेने प्रवाशांना बसावे लागेल, या पद्धतीने ही व्यवस्था करण्यात आली आहे.

अवश्य वाचा- शेतकरी कन्येचा जिद्दीचा प्रवास...परिस्थितीशी झगडत तिने गाठले यशोशिखर

खबरदारीचा उपाय

खबरदारीचा उपाय म्हणून महामंडळाकडून काही सूचना देण्यात आल्या आहेत. यामध्ये प्रवाशांना उभे राहून प्रवास करता येणार नाही. विविध सामाजिक संघटनांसाठी राखीव असलेली आसनव्यवस्था राखीव राहणार नाही. बसमधील आसनक्षमता पूर्ण झाल्यावरही प्रवासी शिल्लक राहिल्यास त्यांच्यासाठी जादा फेरी सोडावी. प्रवाशांची गैरसोय होणार नाही, याची दक्षता घ्यावी. शयनयान बसमधील दोन प्रवाशांच्या आसनावर एकाच प्रवाशास प्रवास करता येईल. महाव्यवस्थापक कार्यालयाने निश्‍चित केलेल्या आसनव्यवस्थेतील आसनेच आरक्षणासाठी उपलब्ध असतील, असे एस. टी. महामंडळाच्या महाव्यवस्थापकांनी विभागीय नियंत्रकांना पाठविलेल्या पत्रातून स्पष्ट केले आहे. 

...तर प्रवास करता येईल 

सूचनांची काटेकोर अंमलबजावणी करण्याचे आवाहन एसटी महामंडळाने केले आहे. कुटुंब प्रवास करीत असताना एकत्र प्रवास करण्याचा आग्रह केल्यास त्यांना सोबत प्रवास करण्याची सुविधा महामंडळाने पुरविली आहे.