भंडारा : शहरातील खात रोड परिसरातील युवकाने वैनगंगेत उडी घेऊन आत्महत्या केल्याचे गुरुवारी सकाळी उघडकीस आले. मृताचे नाव सारंग देशमुख (वय 39) असे आहे.

शहरापासून जवळ असलेल्या वैनगंगा नदीत पहाटेपासून पोहणारे व नदीकाठावर व्यायाम करणाऱ्यांची गर्दी असते. गुरुवारी पहाटेच्या सुमारास नदीच्या पाण्यात मृतदेह असल्याचे पोहणाऱ्यांना आढळून आले. याबाबत त्यांनी कारधा पोलिसांना माहिती दिली. कारधा पोलिस ठाण्याच्या कर्मचाऱ्यांनी घटनास्थळाची पाहणी करून सदर ठिकाण भंडारा शहर पोलिस ठाण्याच्या हद्दीत असल्याचे सांगितले. त्यानंतर भंडारा पोलिसांना माहिती देण्यात आली. 

हेही वाचा - हिंदूत्व कोणाची मक्तेदारी नाही, ते जगावं लागतंय, फडणवीसांचे मुख्यमंत्र्यांना...

पोलिसांच्या उपस्थितीत मृतदेह काठावर आणण्यात आला. तेव्हा खातरोड परिसरातील लक्ष्मीनगर येथील सारंग प्रभाकर देशमुख याचा मृतदेह असल्याची ओळख पटली. त्यानंतर नातेवाइकांना सूचना देऊन मृतदेह उत्तरीय तपासणीसाठी जिल्हा सामान्य रुग्णालयात पाठवण्यात आला. यावेळी वैनगंगा नदीच्या जुन्या पुलावर मोठी गर्दी जमली होती.

सदर युवक केबल ऑपरेटरजवळ सहायक म्हणून काम करत होता. मात्र, कोविड परिस्थितीत त्याच्या आईचा मृत्यू झाला व रोजगार गेल्याची माहिती आहे. यातील नैराश्‍यातून त्याने बुधवारी वैनगंगा नदीच्या पात्रात आत्महत्या केली असावी असा प्राथमिक अंदाज आहे. भंडारा पोलिसांनी घटनेची नोंद केली असून, तपास सुरू आहे.

हेही वाचा - पेट्रोलनं गाठला उच्चांक अन् आता हक्काची हवाही मिळेना; गडचिरोलीतील पंपांची दैना; मालकांचं दुर्लक्ष 

बॅकवॉटरमुळे सुसाईड पॉइंट

गोसेखुर्द धरणात पाणी अडविण्यात आल्यापासून शहराजवळीत वैनगंगा नदीचे पात्र आत्महत्या करण्याचे केंद्र ठरले आहे. नदीच्या पात्रात बऱ्याच मोठ्या प्रमाणात बॅकवॉटर असून नवीन व जुन्या अशा दोन्ही पुलाजवळील पात्रात उडी घेऊन आत्महत्या करणाऱ्यांची संख्या वाढली आहे. या विस्तीर्ण नदीपात्रावर सुरक्षा रक्षकांची नियुक्ती अशक्‍य ठरणारी बाब आहे.

संपादन - अथर्व महांकाळ