नागपूर : बनावट कुलरची राम कुलरच्या नावाने विक्री करून व्यवस्थापकाने इतर तीन व्यावसायिकांच्या मदतीने मालकाची २० लाख रुपयांनी फसवणूक केली. मालक राकेश सूर्यभान अवचट (५०) रा. नवीन शुक्रवारी यांच्या तक्रारीवरून पोलिसांनी चौघांवर गुन्हा नोंदविला आहे. सुधीर चौबे (३४) रा. सुरेंद्रगड, अयुब बंसल (३५), कमल कुमार सिंघल (५९) दोन्ही रा. राजस्थान आणि शैलेश अग्रवाल (३८) रा. रायपूर अशी आरोपींची नावे आहेत.

यातील मुख्य आरोपी सुधीर हा राम कुलर कंपनीत व्यवस्थापक या पदावर होता. तो २०२१ मध्ये कंपनीत कामाला लागला. त्याच्यावर व्यवस्थापनाची संपूर्ण जबाबदारी होती. नागपूरसह इतर राज्यांतील डिस्ट्रिब्यूटर्सशी त्याने चांगली ओळख केली.

कंपनी पॉलिसीनुसार महाराष्ट्रात विकल्या जाणारे कुलर मुळ किमतीत, तर राज्याबाहेर विकल्या जाणाऱ्या कुलरच्या किमती कमी असतात. हीच बाब आरोपीने हेरली. त्याने राजस्थान आणि रायपूरच्या डिस्ट्रिब्यूटर्सशी संगनमत केले. राज्याबाहेर पाठविल्या जाणारे कुलर्स डिस्ट्रिब्यूटर्सला न पाठविता त्यांची परस्पर नागपुरात विक्री केली. यासाठी त्याने कंपनीच्या नावे बनावट बँक खाते उघडले.

होलसेल डीलर्सकडून प्राप्त धनादेश बनावट बँक खात्यात जमा करीत कंपनीची २० लाख रुपयांनी फसवणूक केली. या प्रकरणी अवचट यांनी गणेशपेठ पोलिस ठाण्यात तक्रार दिली. यावरून आरोपी सुधीरविरुद्ध गुन्हा नोंदविला तसेच राजस्थान, रायपूर येथील तीन डिस्ट्रिब्यूटर्सलाही यात आरोपी केले आहे.