नागपूर : डेटिंग ॲप वरून मैत्री करीत, लग्नाचे आमिष दाखवून ३४ वर्षीय तरुणीवर अत्याचार केला. ही घटना बेलतरोडी पोलिस ठाण्याच्या हद्दीत उघडकीस आली. याप्रकरणी पोलिसांनी आरोपीविरुद्ध गुन्हा दाखल केला आहे.

विशाल देशपांडे (वय ४४, रा. बेलतरोडी) असे इसमाचे नाव आहे. पोलिसांनी दिलेल्या माहितीनुसार, ३४ वर्षीय युवतीची विशाल देशपांडे सोबत ‘डेटिंग ॲप’वर एप्रिल महिन्यात मैत्री झाली. यावेळी त्याने तिला खासगी कंपनीत नोकरी करतो असे सांगून, त्याला चांगला पगार असल्याची बतावणी केली. त्यांची बोलचाल सुरू झाली.

काही दिवसात त्याने तिच्यासमोर लग्नाचा प्रस्ताव ठेवला. तिनेही त्याला होकार दिला. विशालने तिला भेटण्यासाठी बोलाविले. त्यांच्या भेटीत त्याने तिच्यावर अत्याचार केला. दरम्यान त्याने तिचा नंबर ब्लॉक केला, शिवाय प्रोफाईलही बंद केले. त्यामुळे युवतीने बेलतरोडी पोलिसांकडे तक्रार दाखल केल्यावर उपनिरीक्षक जावेद तळवी यांनी विशालवर गुन्हा दाखल केला. पोलिसांनी आरोपीचा शोध सुरू केला आहे.