नागपूर : महाविकास आघाडीची स्थापना २०१९ मध्ये झाली. याच आघाडीने तेव्हा भाजपला सत्तेच्या सिंहासनापासून दूर खेचले होते. या विरोधकांच्या एकत्रित शक्तीने महाराष्ट्रातील लोकसभा निवडणुकीमध्ये चांगले यश संपादित केले आहे. महाविकास आघाडीमुळे महायुतीला महाराष्ट्रात बऱ्याच ठिकाणी फटका बसला आहे.

तर इंडिया आघाडीनेही भाजपला देशपातळीवर चुरशीची लढत दिली. शरद पवारांचे कौतुक करीत असताना माजी मंत्री अनिल देशमुख यांनी ते कोणताही चमत्कार घडव शकतात, असा विश्वास माध्यमांशी बोलताना व्यक्त केला.

भारतातील सर्वच पक्षांच्या नेत्यांशी शरद पवार यांचे चांगले संबंध आहेत. इंडिया आघाडीचे यश पाहून नितीश कुमार यांच्यात चलबिचल असेल, असे अनिल देशमुख म्हणाले. पवार यांचे सर्वांशी चांगले संबंध असल्याने ते काहीही घडवू शकतात.

पण ज्या पद्धतीने इंडिया आघाडीच्या नेत्यांनी एकत्र येऊन संपूर्ण देशात एकत्र निवडणूक लढवली, त्याच्यामुळे आघाडीला यश मिळताना दिसत आहे.