नागपूर: ‘‘राज्यघटना बदलण्याची भाषा करणारे लोकसभा निवडणुकीनंतर नरमले. भाजप आणि संघाचा कार्यक्रम हा राज्यघटना बदलण्याचा आहे. २०१४ नंतर ते जाहीरपणे बोलत होते. आता त्यांची भाषा बदलली आहे. लोकसभा निवडणुकीनंतर बहुमतात न आलेल्या भाजपकडून आताही घटना बदलण्याचे काम सुरू आहे. मात्र, लोकांसमोर ते येऊ देत नाही.

त्यांचे काम छुप्या पद्धतीने सुरू आहे,’’ असे मत ‘स्वराज इंडिया’चे संस्थापक व ‘भारत जोडो यात्रे’चे राष्ट्रीय संयोजक योगेंद्र यादव यांनी व्यक्त केले.

‘सकाळ’च्या नागपूर कार्यालयाला यादव यांनी शनिवारी सदिच्छा भेट दिली. ‘भारत जोडो यात्रे’चे महाराष्ट्र संयोजक प्रा. संजय मंगो आदी उपस्थित होते.

यादव म्हणाले, ‘‘भारतीय राज्यघटना अस्तित्वात आल्यापासूनच राष्ट्रीय स्वयंसेवक संघाने त्याचा स्वीकार केला नाही. तेव्हापासूनच हा प्रयत्न सुरू आहे. अटलबिहारी वाजपेयी यांच्या काळात राज्यघटनेची समीक्षा करण्यासाठी समिती स्थापन करण्यात आली होती.’’ यंदाच्या लोकसभा निवडणुकीत सरकार बहुमतात न आल्याने भाजप व संघाचे समर्थक सावध झाले. लोकांसमोर घटनेची शपथ घ्यायलाही ते आता तयार आहेत. राज्यघटनेची शपथ घेऊन ते घटना संपवित आहेत. घटना संपवायची मात्र, लोकांपुढे ते येऊ द्यायचे नाही असा प्रयत्न भाजप सरकार व ‘आरएसएस’कडून सुरू आहे. असा आरोप यादव यांनी केला.

भाजप हा तोडफोड करणारा पक्ष आहे. जिथे जाते तिथे तोडफोड करतो. जातीच्या आधारावर लोकांना विभागण्याचे काम करीत आहे. हरियानात जाट विरुद्ध दलित असा संघर्ष निर्माण केला. महाराष्ट्राच्या निवडणुकीमध्येसुद्धा असाच प्रयत्न होताना दिसत आहे. त्याचा फायदा त्यांना निवडणुकीत होतो. हरियानाच्या निवडणुकीत काँग्रेसला फायदा घेता आली नाही, असे मत यादव यांनी व्यक्त केले.

द्रविड आंदोलन हे राज्यघटनेच्य रक्षणासाठीच होते. मात्र, ‘द्रविड’ शब्दावरून भाजपचा त्यावरही हल्ला सुरू झाला आहे. त्यामुळे भाजपला आता सामन्यात ‘एलबीडब्ल्यू’ नाही तर ‘क्लीन बोल्ड’ करण्याची वेळ आली आहे.

- योगेंद्र यादव, संस्थापक स्वराज इंडिया