नागपूर : ‘मुन्नाभाई एमबीबीएस’ चित्रपटात परीक्षेत कानात डिव्हाइस लावून पेपर सोडविताना अभिनेता संजय दत्तने कॉपी केल्याचा प्रसंग आहे. तसाच हुबेहूब प्रकार रविवारी (ता.२९) कारागृहातील शिपाई पदाच्या भरतीसाठी छत्रपती संभाजीनगरातील युवकाने केला.

त्याने चक्क कानात माईक स्पाय लावून पेपर सोडविण्याचा प्रयत्न केल्याने पोलिसांनी त्याला ताब्यात घेतले. याबाबत मानकापूर ठाण्यात गुन्हा दाखल केला.किसन सीताराम जोनवाल (वय २७, रा, तरटयाची वाडी, बाभूळगाव, वैजापूर, छत्रपती संभाजी नगर) असे आरोपी उमेदवाराचे नाव आहे.

रविवारी क्रीडा संकुल येथे नागपुरातील मध्यवर्ती कारागृहातील शिपाई पदभरतीचा लेखी चाचणीचा पेपर दुपारी घेण्यात आला. किसन जोनवाल पेपर सोडवित असताना, खोलीत असलेल्या निरीक्षकास काही बोलताना दिसला. संशय आल्याने त्याची निरीक्षकाने तपासणी केली असता त्याच्या कानात स्पाय माईक उपकरण आढळले.

हे डिव्हाईस त्याचा मित्र जीवन काकरवाल ( वय २९, रा. रघुनाथपूर वाडी,वैजापूर, छत्रपती संभाजीनगर) याच्याशी कनेक्ट होते. त्यामुळे पोलिसांनी त्याला ताब्यात घेतले. मानकापूर ठाण्यात फसवणुकीचा गुन्हा दाखल करून जोनवाल याला पोलिसांनी अटक केली असून काकरवाल याचा शोध सुरू आहे.

पुटपुटला अन्‌ अडकला जाळ्यात

किसन जोनवाल याने हायटेक इलेक्ट्रानिक डिव्हाईस लपवून आणले होते. त्या आधारे तो पेपर सोडवित होता. दरम्यान एका प्रश्‍नावर तो पुटपुटल्याने खोलीत असलेल्या निरीक्षकाला त्याच्यावर शंका आली. त्यांनी त्याची तपासणी केली. मात्र, त्याच्याकडे काही आढळले नाही. मात्र, त्याच्या कानाजवळ काही असल्याचे दिसून येताच, त्यांनी त्याला विचारणा केली. त्यात किसन गडबडल्याने तो अडकला.