नागपूर : कोरोनाचा आलेख दिवसेंदिवस वाढत असून शुक्रवारी जिल्ह्यात २३० बाधितांची नोंद झाली तर एकाचा मृत्यू झाला. विशेष म्हणजे ग्रामीण भागातही कोरोनाने डोकेवर काढले असून दीडशेवर नागरिक बाधित निघाले. शहरात ७३ बाधितांची नोंद झाली. दरम्यान, ८४ जण कोरोनामुक्त झाले.

जिल्ह्यात बाधितांचा वाढता आलेख शहरवासीयांच्या चिंतेत भर घालणारा आहे. बाधितांच्या दोन अंकी आकड्यानंतर प्रथमच बाधितांची संख्या २३० पर्यंत पोहोचली. त्यामुळे नागरिकांनी आता सावध होण्याची गरज व्यक्त होत आहे.

गर्दी टाळण्याचे आवाहन

जिल्हा प्रशासन तसेच महापालिकेने नागरिकांना मास्कचा वापर,

एकाच दिवशी २३० बाधित, एकाचा मृत्यू

गर्दी टाळण्याचे आवाहन केले आहे. मात्र, नागरिक कोरोनाला गांभीर्याने घेत नसल्याचे चित्र असून नव्या बाधितांची संख्या धडकी भरविणारी आहे. विशेष म्हणजे आतापर्यंत शहरापेक्षा बाधितांची संख्या कमी असलेल्या ग्रामीण भागात आज १५२ बाधित आढळले. शहरातील ७३ नवे बाधित असून एकाच्या मृत्यूचीही नोंद झाली.

सक्रीय रुग्णांची संख्याही ७७७

वाढत्या बाधितांमुळे सक्रीय रुग्णसंख्याही ७७७ पर्यंत पोहोचली. यात ग्रामीण भागातील ३६४ तर शहरातील ३९० जणांचा समावेश आहे. २३ जण जिल्ह्याबाहेरील आहेत. दरम्यान, आज ८४ जणांनी कोरोनावर मात केली असून यात शहरातील ५६ तर ग्रामीण भागातील २८ जणांचा समावेश आहे. २ हजार १३४ जणांच्या चाचणीतून २३० बाधित आढळले. ही टक्केवारी दहापेक्षा जास्त आहे. त्यामुळे प्रशासनाने नागरिकांना मार्गदर्शक तत्त्वांचा वापर करण्याचे आवाहन केले आहे.