Nagpur Covid Patients: महानगरपालिकेच्या सर्वच झोनमध्ये कोरोनाचे रुग्ण आढळून येत आहेत. सोमवारी (ता.१) ५ नवीन बाधितांची भर पडली. यामुळे नागपुरात आठवडाभरात एकूण सक्रिय बाधितांची संख्या ४५ वर पोहोचली आहे. विशेष असे की, बाधितांचा आकडा अर्धशतकापलिकडे पोहोचला आहे. मात्र जिनोम सिक्वेंसिगसाठी पाठवलेल्या नमुन्यांचा अहवाल प्रलंबित असल्यामुळे जेएन.१ या व्हेंरियंटबाबत घोळ कायम आहे.

सध्या जिल्ह्यातील ग्रामीण भागात सध्या एकही रुग्ण नाही. परंतु यापूर्वी पाच रुग्ण होते. चार रुग्ण बरे झालेत. आरोग्य यंत्रणा अधिक सतर्क झाली आहे.महापालिकेकडून नवीन जेएन.१ व्हेरियंटच्या तपासणीसाठी सर्व बाधितांचे नमुने जिनोम सिक्वेंसिगंसाठी निरी वा इतर जनुकीय चाचणी प्रयोगशाळेत पाठवले गेले आहेत.

काही अहवाल गेले दिल्लीत
उपराजधीनीतून जिनोम सिक्वेसिंगसाठी पाठवलेल्या पहिल्या सात ते आठ चाचण्यांचे अहवाल निरीच्या प्रयोगशाळेने केंद्रीय संस्थेला पाठवले आहेत, अशी माहिती सूत्रांनी दिली. परंतु, निरीकडून नागपुरातील आरोग्य खात्याला थेट अहवाल मिळाला नाही.

केंद्र सरकारच्या सूचनेनुसार आता स्थानिक आरोग्य विभागाला अहवाल न देता थेट केंद्राला अहवाल पाठविण्याच्या नियमांवर बोट ठेवण्यात येत असल्याचा प्रकार सुरू असल्याची जोरदार चर्चा आरोग्य विभागात आहे. स्थानिकांना तातडीने हे अहवाल मिळत नसल्यास येथे ‘जेएन’ १ चे वेगाने होणारे संक्रमण थांबणार कसे, हा प्रश्न अनुत्तरित आहे. (Latest Marathi News)