नागपूर ः महाराष्ट्र एक्स्प्रेसमध्ये बुधवारी दुपारी सुमारे ४५ वर्षेवयोगटातील व्यक्तीचा मृतदेह आढळून आला. बुधवारीच नागपूर रेल्वेस्थानकावरील कार पार्किंग परिसरात वृद्ध महिलेचाही मृतदेह आढळून आला. लोहमार्ग पोलिसांनी अकस्मात मृत्यूची नोंद करीत त्यांची ओळख पटविण्याचा प्रयत्न सुरू केला आहे.

हेही वाचा - 'मेडिकल'च ठरतेय कोरोनाचे हॉटस्पॉट,...

०१०३९ कोल्हापूर-गोंदिया महाराष्ट्र एक्स्प्रेस बुधवारी दुपारी ३.१५ वाजताच्या सुमारास नागपूर रेल्वेस्थानकावर दाखल होताच. या गाडीच्या रियर बोगीत ४५ ते ५० वर्षे वयोगटातील व्यक्ती बेशुद्धावस्थेत पडून होता. कोणतीही हालचाल करीत नसल्याने रेल्वे कर्मचाऱ्यांना माहिती देण्यात आली. 

लागलीच रेल्वेच्या डॉक्टर ज्योत्सना यांना पाचारण करण्यात आले. त्यांनी तपासताच मृत घोषित केले. माहिती मिळताच लोकमार्ग पोलिसांनी घटनास्थळ गाठून पंचनामा करीत मृतदेह मेयो रुग्णालयाकडे रवाना केला. मृताची ओळख पटू शकली नाही.

हेही वाचा - आरक्षणाच्या समर्थनार्थ एकवटले ओबीसी सदस्य; सरकारची...

याच प्रमाणे बुधवारी दुपारी २.२० वाजताच्या सुमारास नागपूर रेल्वेस्थानकाच्या पार्किंगमध्ये ६० ते ६५ वर्षे वयोगटातील अनोळखी महिला निपचित पडून असल्याचे भारवाहकांना दिसले. त्यांनी लागलीच उपस्टेशन व्यवस्थापक कार्यालयाला माहिती दिली. तिथून लोहमार्ग पोलिसांना कळविण्यात आले. पोलिस हवालदार फुसाटे व सहकाऱ्यांनी पंचनामा करीत मृतदेह शवविच्छेदनासाठी मेयो रुग्णालयाकडे रवाना केला.