नागपूर : स्मार्ट सिटीकडे वाटचाल करणाऱ्या नागपूर शहरात ‘आपली बस’च्या तिकीटमध्येही डिजिटलायजेशन होत आहे. याकरिता महापालिकेच्या परिवहन विभागाने ‘चलो’ ॲप प्रवाशांच्या सेवेत आणला आहे. ऑनलाइन तिकीट काढणाऱ्यांना पूर्वी प्रमाणे कागदी तिकीट देणे बंद करण्यात येणार आहे.

एकाच मार्गावरील बस किती वेळेत येणार, क्यूआर कोड स्कॅन करून तिकीट काढता येणार ही सर्व सुविधा ॲपमध्ये करून देण्यात आली असल्याची माहिती चलो मोबिलिटी ॲपचे वरिष्ठ उपाध्यक्ष अरुण गिदरोनिया यांनी पत्रपरिषदेत दिली.

गेल्या चार महिन्यापासून या ॲपची चाचणी सुरू आहे. आता पर्यंत जवळपास ४० हजार प्रवाशांनी हा ॲप डाऊनलोड केला आहे. देशातील ६० पेक्षा जास्त शहरात या ॲपची सेवा शहर वाहतुकीसाठी सुरू आहे. महाराष्ट्रात मुंबई, छत्रपती संभाजी नगर आणि आता नागपूरकरांच्या सेवेत हा ॲप आणला आहे. बसमध्ये होणारी गर्दी टाळण्यासाठी बसमध्ये किती प्रवासी आहेत. त्यात सीट मिळणार का? बस कोणत्या वेळेत स्थानकावर येणार याचे अचूक लोकेशन, क्यूआरकोडने ऑनलाइन तिकीट, विद्यार्थ्यांसह इतरही प्रवाशांच्या पासेस, ॲपवरुन वाहकाला पैसे दिल्यास मोबाईलवरच तिकीट दिसणार आहे.

पास डिजिटल स्वरुपात

पास दाखवल्यावरही मोबाईलवर तिकीट दिसणार आहे. या पास डिजिटल स्वरूपात असणार आहेत. गेल्या चार महिन्यात २० टक्के ही सुविधा डिजिटल स्वरूपात झाली असल्याची माहिती गिदरोनिया यांनी दिली. पत्रपरिषदेला मनपाच्या परिवहन विभागाचे व्यवस्थापक गणेश राठोड, अधिकारी विकास जोशी आदी उपस्थित होते.