नागपूर : चीननेही भारतातील व्यापाऱ्यांना थेट इलेक्ट्रॉनिक्स वस्तूंच्या (electronic gadget) विक्रीवर बंधने आणली आहेत. त्यामुळे सिंगापूर, हाँगकाँगमार्गे भारतात या वस्तूंची आवक होऊ लागल्याने आता इलेक्ट्रॉनिक्स वस्तूंचे भाव (electronic gadget rates) ३० ते ६० टक्क्यांनी वाढले आहे. या महागाईचा फटका ग्राहकांना बसू लागला आहे. परिणामी सर्वसामान्यांना ऑनलाइनच्या शिक्षणाचा (online education) खर्च भार वाटू लागला आहे. (electronic gadget rates increased)

कोरोनाच्या प्रभावामुळे देशभरात टाळेबंदी करण्यात आल्याने शाळा-महाविद्यालये बंद झालीत. सर्वच शिक्षण ऑनलाइन दिले जाऊ लागले. त्याचवेळी चिनी मालाच्या आयातीवर बंधने आणली. त्यामुळे पहिल्या लाटेत लॅपटॉप, कॉम्प्युटर, प्रिंटरसह इतरही इलेक्ट्रॉनिक्स वस्तूंच्या किमती १० ते १५ टक्के वाढल्या होत्या. मात्र, दुसऱ्या लाटेनंतर चीननेही भारतातील व्यापाऱ्यांना थेट वस्तूंची विक्री बंद केल्याने भाव कडाडले आहेत.

मोबाईलपासून ते घरातील विजेचे दिवे, विविध प्रकारचे स्विच, इलेक्ट्रॉनिक उपकरणे त्याचबरोबर सेमी कंडक्टर, मदरबोर्ड यांची चीनमधून आयात केली जाते. भारतीय बाजारपेठ आणि इतर देशांच्या तुलनेत या वस्तू चीनमधील बाजारातून स्वस्तात मिळत होत्या. आता चीनचा माल सिंगापूर आणि हाँगकाँगमार्गे भारतात दाखल होत असल्याने वाहतूक आणि त्या देशातील कराचा बोझा ग्राहकांवर पडल्याने इलेक्ट्रॉनिक्स वस्तूंचे भाव वाढले आहेत. आवक कमी झाल्याने इलेक्ट्रॉनिक्स वस्तूंचा तुटवडा अजूनही जाणवतो आहे. आता डिझेलचे दर वाढल्याने पुन्हा भाववाढ होण्याची शक्यता आहे.