नागपूर : लहान भावाने आणलेला समोसा मोठ्या भावाने खाल्ला. त्यामुळे राग भरलेल्या अकरा वर्षीय लहान भावाने घरात गळफास घेऊन आत्महत्या केली. ही हृदयद्रावक घटना सोमवारी गिट्टीखदान परिसरात उघडकीस आली. विरू नत्थू साहू (रा. गंगानगर, काटोल रोड) असे आत्महत्या केलेल्या मुलाचे नाव आहे. 

पोलिसांनी दिलेल्या माहितीनुसार, नत्थू साहू हे पत्नी व दोन मुलांसह गंगानगर काटोल रोडवर राहतात. त्यांचा मोठा मुलगा धीरज (वय 13) हा आठवीत तर लहान मुलगा विरू (वय 11) हा पाचव्या वर्गात शिकत होता. नत्थू हे मूळचे मध्यप्रदेशातील रहिवासी आहे. व्यवसाय करण्यासाठी ते नागपुरात आले आहेत. ते हातठेल्यावर भाजीपाला विक्रीचा व्यवसाय करतात.

महत्त्वाची बातमी - हे तंत्रज्ञान ठरणार शेतकऱ्यांसाठी वरदान...कीड नियंत्रणासाठी लावले यंत्र

नेहमीप्रमाणे नत्थू रविवारी सकाळी भाजीपाला घेऊन घरून निघून गेले. रात्री आठ वाजताच्या सुमारास पत्नी फुलाबाई ही स्वयंपाक करीत होती तर मुले बाहेर खेळत होती. अचानक विरूने समोसा खाण्याची इच्छा व्यक्‍ती केली. त्याने आईला 10 रुपये मागितले. पैसे मिळाल्यानंतर तो लगेच हॉटेलमध्ये गेला आणि समोसा विकत आणला. 

"हात पाय धुतल्यानंतर समोसा खा', असे आईने सांगितल्यामुळे तो बाथरूममध्ये गेला. तेवढ्या वेळात घरात आलेल्या धीरजने किचनमध्ये ठेवलेला समोसा खाऊन घेतला. काही वेळात विरू बाथरूममधून बाहेर आला. त्याने टॉवेलला हातपाय पुसले आणि समोसा खाण्यासाठी किचनमध्ये गेला. त्याला समोसा दिसला नाही. त्यामुळे त्याने रडपड सुरू केली. आईने विचारल्यानंतर धीरजने समोसा खाल्याची कबुली दिली. आईने त्याला पुन्हा दहा रुपये देत समोसा आणण्यास सांगितले. मात्र, तो रूसून बसला. काही वेळानंतर अचानक उठला आणि रूममध्ये गेला.

जाणून घ्या - 'तो` देखणा तर `ती` सौंदर्यवान येणार आज सर्वाधिक जवळ...

...अन्‌ घेतला गळफास

विरूने रूमचे आतून दार लावून घेतले. त्याने कपाटातील आईची साडी घेतली. खुर्चीवर चढून ती सिलिंग फॅनला बांधली. फास तयार केल्यानंतर गळफास घेऊन आत्महत्या केली. बराच वेळ झाला तरी विरू रूममधून बाहेर येत नव्हता. त्यामुळे आईने दार ठोठावले. मात्र, प्रतिसाद मिळाला नाही. आईने खिडकीतून बघितले असता विरू गळफास घेतलेल्या अवस्थेत दिसला. 

हट्टीपणा घेतोय बळी 
लहान मुलांमध्ये सध्या हट्टीपणा वाढत आहे. जी वस्तू त्याला हवी अन्‌ ती मिळाली नाही तर तो आकांततांडव करतो. त्याचे मनावरील नियंत्रण सुटते. मग ती गोष्ट मिळविण्यासाठी काहीपण करण्याची तयारी असते. म्हणून पालकांनी घरात मुलांना तडजोड करणे शिवकणे आवश्‍यक आहे. मनासारखे घडले नाही की राग येतो. मुलांची प्रत्येक मागणी पूर्ण करू नका. मुलांना काही गोष्टी मुद्दाम देऊ नका. यामुळे त्याची नकार स्वीकारण्याची मानसिक तयारी होते. 
- राजा आकाश, 
मानसोपचार तज्ञ

संपादन - नीलेश डाखोरे