नागपूर : वाढत्या कोरोना रुग्णांमुळे रेमडेसिव्हिर (remdesivir) आणि फॅविपीरावीर औषधांचा काळाबाजार सुरू झाला. सर्वत्र रेमडेसिव्हिरची बोंबाबोंब सुरू असताना मेडिकलमध्ये रक्त पातळ करणारे ‘इनोक्स्यापॅरिन’ (enoxaparin injection) या इंजेक्शनचाही तुटवडा आहे. मागील पंधरा दिवसांपासून हे इंजेक्शन एकाही रुग्णाला लावण्यात आलेले नाही. रेमडेसिव्हिरसारखी बोंबाबोंब होऊ नये म्हणून रुग्णांच्या प्रीस्किप्शनवरही लिहून देण्याचे डॉक्टरांकडून टाळण्यात आले असल्याची धक्कादायक माहिती पुढे आली. (enoxaparin injection not avaialble in gmc nagpur)

जिल्ह्यात मागील महिनाभर कोरोनाचा कहर होता. दररोजच्या बाधितांची संख्या सात हजारांवर पोहोचली होती. आरटीपीसीआर या कोरोना चाचणीपासून तर एचआरसीटी काढण्यासाठी रुग्णांची तोबा गर्दी होती. कोरोनाबाधितांची संख्या अचानक वाढल्याने मेयो, मेडिकल किंवा एम्समध्ये खाट मिळणे दुरापस्त झाले होते. औषधांचीही कमतरता जाणवू लागली. रेमडेसिव्हिर कोरोनासाठी जीवनरक्षक नाही. हे सर्वांना माहिती आहे. मात्र काही प्रमाणात का होईना लाभ होतो. यामुळे बाधितांचे जीव वाचवण्यासाठी रेमडेसिव्हिर खरेदीसाठी काळाबाजार सुरू झाला. जास्त डोजमुळे रक्ताच्या गुठळ्या तयार होण्याची समस्या जाणवू लागली. यामुळे रक्त पातळ करण्यासाठी ‘इनोक्स्यापॅरिन’ हे इंजेक्शन लावण्यात येत होते. गरज असलेल्या बहुतांश रुग्णांना हे इंजेक्शन दिले जात होते. मात्र पंधरा दिवसांपासून या इंजेक्शनचा तुटवडा आहे. हे इंजेक्शन खरेदी करण्यासाठी प्रशासनाने अद्याप आदेश दिलेले नाही. मेडिकल प्रशासनाने देखील चुप्पी साधली आहे.

नागपूर व विदर्भातील बातम्या वाचण्यासाठी इथं क्लिक करा

सद्या मेडिकलमध्ये ७०० कोरोनाबाधित उपचार घेत आहेत. यापैकी दीडशेहून अधिक व्यक्ती व्हेंटिलेटरवर आहेत. त्यांना ‘इनोक्स्यापॅरिन’ इंजेक्शनची गरज आहे. मात्र, हे इंजेक्शन खरेदी विभागाने खरेदीच केले नाही. इंजेक्शन मिळत नसेल तर ‘डॉलटेपॅरिन’ हे पर्यायी इंजेक्शन आहे, मात्र तेसुद्धा मेडिकलच्या औषधालयात नसल्याची माहिती आहे. दररोज मेडिकलमध्ये सुमारे पन्नासपेक्षा अधिक रुग्णांना हे इंजेक्शन लावण्यात येत होते. मात्र आता इंजेक्शनचा साठा संपल्याने कुणालाच इंजेक्शन लावण्यात येत नाही. हीच स्थिती मेयोची असल्याचे सूत्रांनी सांगितले. यासंदर्भात अधिक माहिती घेण्यासाठी प्रशासनाशी संपर्क साधला असता तो होऊ शकला नाही.

काय आहे इनोक्स्यापॅरिन?

काही औषधांच्या जास्त डोसमुळे कोरोनारुग्णांमध्ये रक्ताच्या गाठी तयार होत असल्याचे पुढे आले. यामुळे बाधितांना ह्रदयविकाराचा धोका असल्याचे तज्ज्ञांचे म्हणणे आहे. यामुळे रक्त पातळ करण्यासाठी मेडिकलमध्ये डॉक्टरांकडून ‘इनोक्स्यापॅरिन’ हे इंजेक्शन लावण्यात येत होते.