नागपूर : आर्थिक चणचणीतून व्यापाऱ्याला धमकी देत त्याच्या मोपेडसह पावणेतीन लाखांची रोख लुटणाऱ्या टोळीला कळमना पोलिसांनी अटक केली आहे. १ ऑक्टोबरला पावणेतीन लाख रुपयांसह मोपेड हिसकावून पसार झाले होते.

जयराज ऊर्फ सोनू मोहन वर्मा (वय ३९), निलेश ऊर्फ दादू गंगाधर वर्मा (वय २४, दोन्ही रा. विजय नगर), रजा ऊर्फ भुरू रियाज खान (वय २४, रा. ऊंटखाना, कामठी), आनंदकुमार दामूराम वर्मा (वय १९, रा. डिप्टी सिग्नल), रूपेन्द्र ऊर्फ गोलू मंगलराम सारवा ऊर्फ साहू (वय ३१, रा. लक्ष्मीनगर, कळमना), दिनानाथ गजानन पौनिकर (वय ४२, रा. विजयनगर, कळमना), कलीम सलीम खान (वय २४, रा. खलासी लाईन, कामठी) अशी अटकेतील आरोपींची नावे आहेत.

पोलिसांनी दिलेल्या माहितीनुसार, रुपेंद्र हा संतोष कार्तिक शाहू (वय ४५, आभा कॉलनी, कळमना) यांच्याकडे चार वर्षांपूर्वी हमाल म्हणून काम करायचा. त्याने नोकरी सोडली होती. दरम्यान त्याला संतोष दररोज मोपेडमधून मोठ्या प्रमाणात रोख रक्कम घेऊन जात असल्याची माहिती होती.

आर्थिक तंगी आणि पैसे मिळत नसल्याने तो त्रस्त होता. त्यामुळे त्याने ही माहिती रजा, नावेद आणि निलेश यांना सांगितली. रजा आणि नावेद हे कुख्यात गुंड असल्याने त्यांनी ही लुटण्याचा निर्णय घेतला.