नागपूर : राज्य सरकारने (state governement)काल, शुक्रवारी निर्बंध जाहीर करताच केंद्रीयमंत्री नितीन गडकरी(nitin gadkari) यांच्या संकल्पनेतील सांस्कृतिक खासदार महोत्सव रद्द करण्यात आल्याचे तत्काळ जाहीर करण्यात आले. परंतु महापौर दयाशंकर तिवारी(mayor dayashankar tiwari) यांच्या अखिल भारतीय राष्ट्रीय कवी संमेलनात श्रोत्यांची गर्दी दिसून आली. त्यामुळे पक्षातील मोठ्या नेत्यांचा आदर्शही महापौरांनी घेऊ नये, याबाबत आश्चर्य व्यक्त करण्यात येत आहे.

राज्यात वाढत्या ओमिक्रॉन रुग्णांमुळे तसेच नववर्षाच्या स्वागतानिमित्त होणारी गर्दी लक्षात घेता राज्य सरकारने काल, शुक्रवारी नवीन नियमावली जाहीर करीत निर्बंध घातले. महापालिका आयुक्तांनी आजपासूनच निर्बंधाच्या अंमलबजावणीचे आदेश काढले. निर्बंधामध्ये सांस्कृतिक व मनोरंजनात्मक कार्यक्रमासाठी केवळ ९ वाजेपर्यंत परवानगी देण्यात आली आहे. राज्य सरकारने आदेश काढताच, केंद्रीयमंत्री नितीन गडकरी यांच्या संकल्पनेतून होत असलेल्या खासदार सांस्कृतिक महोत्सव रद्द केल्याची माहिती काल, शुक्रवारीच आयोजन समितीने दिली.

शनिवार, रविवारचे कार्यक्रम रद्द करण्यात आल्याचे आयोजन समितीने स्पष्ट केले. महापौर दयाशंकर तिवारी यांनीही गांधीबाग उद्यानात आज काव्य संमेलनाचे आयोजन केले. महापालिका आयुक्तांनी आजपासून निर्बंध जाहीर केल्यानंतर महापौरांनी काव्य संमेलनाची वेळ रात्री बारापासून नऊपर्यंत कमी केली. याबाबत त्यांनी त्यांच्या फेसबूकवर पोस्टही शेअर केली. गांधीबाग उद्यानात आज सायंकाळी सहा ते नऊ या वेळेत कवी संमेलन पार पडले. परंतु केंद्रीयमंत्री नितीन गडकरी हे खासदार महोत्सव रद्द करतात, तर महापौर नागरिकांच्या सुरक्षेसाठी काव्य संमेलन रद्द करू शकत नव्हते काय? अशी चर्चा सुरू झाली आहे. काव्य संमेलन पूर्वनियोजित होते तर खासदार महोत्सवही पूर्वनियोजित होता. केंद्रीयमंत्री गडकरी महापौरांचेही नेते आहे. परंतु नागपूरकरांच्या सुरक्षेसाठी नेत्याकडूनही प्रेरणा घेऊ नये, याबाबत आश्चर्य व्यक्त करण्यात येत आहे.