नागपूर : बांधकाम प्रकल्पातील वादातून भागीदारांनी व्यावसायिकाचे मध्यप्रदेशातील मुलताई येथून अपहरण केले. नंतर बंदुकीचा धाक दाखवित दस्तऐवजांवर स्वाक्षरी करण्यासाठी त्याला मारहाण केल्याची धक्कादायक घटना समोर आली. याप्रकरणी संदीप रामदास पेंडके (वय ४५, रा. श्रीनाश, साईनगर, अजनी) यांनी तक्रार दाखल केली. वाडी पोलिसांनी तिघांवर गुन्हा दाखल केला.

चंद्रशेखर तुळशीराम वाकडे (वय ५३, रा.ओंकारनगर), राखी अमर राऊत (वय ३५) अमर बाबाराव राऊत (वय ४०, रा. वसंतनगर) अशी आरोपींची नावे आहेत. पोलिसांनी दिलेल्या माहितीनुसार, संदीप पेंडके हे बांधकाम व्यावसायिक असून त्यांनी चंद्रशेखर वाकडे, राखी आणि अमर राऊत यांच्यासह भागीदारीत सुराबर्डी येथे ‘सहारा व्हॅली’नावाने २०१७ मध्ये प्रकल्प सुरू केला. दरम्यान त्यांचे आणि तिघांचे त्या प्रकल्पात आर्थिक व्यवहारातून वाद सुरू झाले.

दहा दिवसांपूर्वी संदीप पेंडके यांची आजी उषाताई रामकृष्ण पाटील यांचे बैतूल जिल्ह्यातील मुलताई येथे निधन झाले. त्यासाठी ते बैतूलला गेले होते. शनिवारी (ता.३) सायंकाळी साडेसहा वाजताच्या सुमारास चौदावीच्या कार्यक्रमात असताना त्यांचा मानलेला भाऊ संजय शाहू यासह जात असताना, चंद्रशेखर वाकडे, राखी आणि अमर राऊत हे तिथे चारचाकीने (एमएच३१एफई७७७७) पोहचले. त्यांनी संदीप यांना धक्काबुक्की करीत चारचाकी वाहनात बसविले. संजय याला त्यांनी पोलिसांना बोलाविण्यास सांगितले.

राखी राऊत यांनी वाहन चालवित त्यांना घेऊन नागपूरनजिक असलेले दहेगाव गाठले. तिथे एका ठिकाणी थांबविले. तेव्हा एक अनोळखी व्यक्ती तिथे आली. त्याने त्यांच्या कानाखाली बंदुक लावून काही दस्तऐवजावर स्वाक्षरी करण्यास सांगितले.

मात्र, त्याला नकार देताच, त्याने शिवीगाळ आणि मारहाण केली. त्यानंतर तिघांनीही सुराबर्डीतील सहारा व्हॅली प्रकल्पाजवळ आणून काही फ्लॅटधारकांना बोलाविले. यादरम्यान संदीप यांचा भाऊ जयदीप तिथे वाडी पोलिसांसह पोहचला. पोलिसांनी सर्वांना ताब्यात घेऊन वाडी ठाणे गाठले.