नागपूर : ‘लिव्ह इन रिलेशनशिप’च्या क्रेझपोटी आपल्यापेक्षा वयाने लहान असलेल्या तरुणाच्या प्रेमात पडून त्याच्याशी ‘लिव्ह इन’मध्ये राहण्याच्या निर्णय एका तरुणीने घेतला. या प्रेमातून त्यांना एक अपत्यही झाले. काही वर्षे सोबत राहिल्यावर दुसरीवर प्रेम जडल्याने तरुणाने आपल्या मैत्रिणीशी लग्न करण्याचा निर्णय घेतला. मात्र, वेळीच समुपदेशन केंद्राच्या मदतीने तिसरीचे मार्गदर्शन केल्याने तिने माघार घेतली. यातून दोघांचाही संसार वाचला.

बदलत्या युगात आता प्रेमाचे प्रकारही बदलले आहेत. नव्या प्रेमाची संकल्पना म्हणून सध्या खूपच प्रचलित झाली आहे. त्यामुळे नव्या पिढीमध्ये याचे क्रेझ जरा जास्तच आहे. त्यातून आजकाल ‘लिव्ह इन’मध्ये राहण्याचे प्रकार वाढले आहेत. मात्र, अनेकदा या प्रेमात ट्विस्ट निर्माण होताना दिसून येतो. कोतवाली पोलिस ठाण्याच्या हद्दीत असाच एक प्रकार घडला. २८ वर्षीय तरुणीचे २७ वर्षीय तरुणावर प्रेम जडले. त्यातून दोघांनीही लिव्ह इन रिलेशनशिप मध्ये राहण्याचा निर्णय घेतला. तब्बल पाच वर्षे एकमेकांसोबत राहिल्यावर त्यांना एक अपत्यही झाले.

मात्र, यादरम्यान तरुणाचे दुसऱ्याच मुलीवर प्रेम जडले. यातून त्यांच्या आनाभाकाही सुरू झाल्या. ही बाब २८ वर्षीय तरुणीला माहिती पडली. तिने त्याला अनेकदा रोखण्याचा प्रयत्न केला. मात्र, तिची नजर चुकवून तो तिच्याशी भेटायचा. दोघांनी लग्न करण्याचेही ठरविले. दरम्यान, ही बाब कोतवाली पोलिसांकडे येताच, त्यांनी प्रकरण महाल येथील शालीनीताई बहुउद्देशिय शिक्षण संस्थेच्या माध्यमातून महिला व बालविकास केंद्राद्वारे झोन सहामधील महापालिकेच्या समुपदेशन केद्राकडे पाठविले.

समुपदेशन केंद्रातील मंगला महाजन, दीप्ती मेंढेकर व सारिका चवरे यांनी दोघांचे मार्गदर्शन करण्यास सुरुवात केली. यावेळी त्यांची माहिती घेताना समोर आलेल्या तथ्यातून त्यांची मनधरणी करण्यास सुरवात झाली. विशेष म्हणजे, दोघांसह तरुणाच्या प्रेयसीलाही समुपदेशनासाठी बोलाविण्यात आले. यावेळी तिचे मतपरिवर्तन करीत, मुलास लग्नाला नकार देण्यास सांगण्यात आले. तिने ते केल्याने दोघांनीही संसार सुरळीत करण्यास मदत झाली.

असा झाला गैरसमज

लिव्ह इन रिलेशनशिपमध्ये असलेल्या तरुणाच्या मनात असलेल्या गैरसमजातूनच हा प्रकार घडल्याची बाब समुपदेशातून पुढे येत आहे. विशेष म्हणजे त्याच्या आई वडिलांचेही ‘लिव्ह इन’ असल्याने त्यातून वडिलांनी त्यांचा त्याग केला होता. यावेळी वडिलांना काहीच शिक्षा न झाल्याने त्यानेही त्याच समजुतीतून हा प्रकार केल्याचे दिसून आले.