Nagpur Police Exposed Murder Conspiracy: आयुर्वेदिक डॉक्टरला लुटून त्याची हत्या करण्याची सुपारी घेऊन मध्यप्रदेशातून आलेल्या ‘सुपारी किलर’ला गुन्हेशाखेच्या युनिट तीनच्या पथकाने अटक केली. याप्रकरणी दोन साथीदार फरार असून त्यांचा शोध सुरू आहे.

आशिष जगदीश शर्मा (वय ३४,रा.अंजनीनगर,भिंड, मध्यप्रदेश), असे अटकेतील आरोपीचे नाव आहे. अमित राजवीर शर्मा(वय ३०) व राहुल (वय ३०, दोन्ही रा. उत्तर प्रदेश),अशी फरार साथीदारांची नावे आहेत.

पोलिसांनी दिलेल्या माहितीनुसार, आशिष व त्याचे साथीदार कुख्यात गुन्हेगार आहेत. तपासात तिघांनाही एका आयुर्वेदिक डॉक्टरला लुटून त्याची हत्या करण्याची सुपारी घेतली असल्याचे कळते. त्यासाठीच ते तिघेही नागपुरात आले होते. (Latest marathi News)

दरम्यान गुन्हेशाखेचे उपायुक्त निमित गोयल यांच्या मार्गदर्शनाखाली युनिट तीनच्या सहाय्यक पोलिस निरीक्षक समाधान बजबळकर, उपनिरीक्षक मधुकर काठोके, सतीश पांडे, दशरथ मिश्रा, विजय श्रीवास, दीपक दासरवार, दीपक लाखडे, प्रमोद देशभ्रतार हे कोतवाली पोलिस ठाण्याच्या हद्दीतील सेंट्रल हॉटेल मागे गस्त घालत होते. तिघेही पोलिसांना संशयास्पदस्थितीत फिरताना दिसली.

पोलिस त्यांना पकडण्यासाठी गेले असता दोघे पसार झाले. आशिष हा पोलिसांच्या हाती लागली. त्याच्याकडील पिशवीची पाहणी केली असता पोलिसांना दोन देशीकट्टे, नऊ जिवंत काडतुसे आढळली. चौकशीदरम्यान त्याने एका आयुर्वेदिक डॉक्टरला लुटून त्याची हत्या करण्यासाठी नागपुरात आल्याचे त्याने सांगितले. पोलिस त्याच्या दोन साथीदारांचा व सुपारी देणाऱ्याचा शोध घेत आहेत. (Latest marathi News)