Nagpur - उपराजधानीतील आंतरराष्ट्रीय टेबलटेनिसपटू जेनिफर वर्गीसने रिओ दी जिनेरिओ (ब्राझील) येथे आयोजित जागतिक टेबलटेनिस कंटेडर स्पर्धेत १५ वर्षांखालील मुलींच्या एकेरी व मिश्र दुहेरी प्रकारांमध्ये दुहेरी विजेतेपद पटकाविले.

जेनिफरने मुलींच्या एकेरीतील अंतिम सामन्यात भारताच्या सयानिका माझीचा ११-४, ११-८, ६-११ व ११-९ ने पराभूत करून विजेतेपद मिळविले. त्याअगोदर, झालेल्या उपांत्य सामन्यात जेनिफरने भारताच्याच रियाना भुटाला १३-११, ९-११, ११-३, ११-४ ने नमवून अंतिम फेरीत प्रवेश निश्चित केला होता.

मिश्र दुहेरीतील चुरशीच्या अंतिम सामन्यात जेनिफर व प्रधिवधी भयंकरम या जोडीने यजमान ब्राझीलच्या ज्युलिया हाताकेयामा व लुकास रोमास्की या जोडीला ९-११, ११-८, १३-११, ११-१३, ११-९ ने पराभूत करीत दुहेरी विजेतेपदाला गवसणी घातली. उपांत्य लढतीत जेनिफर व प्रधिवधीने ब्राझीलच्या अबिगेल मिनेझिम व यामाने हॅमिल्टनचा ११-८, ११-५, ११-२ ने धुव्वा उडविला. जेनिफरने पेरू येथे नुकत्याच झालेल्या अन्य एका जागतिक स्पर्धेतही १५ वर्षांखालील मुलींच्या एकेरी व दुहेरीमध्ये रौप्यपदक जिंकले होते.