जलालखेडा (जि. नागपूर) : नागपूर जिल्ह्यातील नरखेड तालुक्यातील बेलोना येथे राहणाऱ्या सहा वर्षीय बालिकेवर अत्याचार केल्याची घटना उघडकीस आली. या घटनेने खळबळ उडाली आहे. या प्रकरणी पोलिसांनी तातडीने संशयित नराधमास ताब्यात घेतले. चौकशीनंतर त्याला अटक केली आहे. (Nagpur Crime News)

नरखेड तालुक्यातील बेलोना येथे पीडित सहा वर्षीय मुलगी आईवडिलांसह राहते. काल (ता. २५) सायंकाळी ७.३० वाजता सुमारास पीडित मुलगी शौचालयासाठी गेली होती. त्यावेळी गावातच राहणाऱ्या आरोपी निखिल केशव मस्के वय २३ रा. बेलोना याने घरात अनधिकृत प्रवेश करून मुलीला चॉकलेटचे अमिष दाखवून चुकीच्या भावनेने तिचा लाड करून बळजबरीने लैंगिक अत्याचार केला. हा प्रकार पीडित मुलीच्या नातेवाइकांच्या लक्षात आल्यानंतर त्यांनी नरखेड पोलिसांत धाव घेतली.

सदर प्रकरणी फिर्यादीच्या रिपोर्टवरून पोलीस स्टेशन नरखेड येथे आरोपी विरुद्ध कलम ३४६ (अ ब ), ४५१ भादवी सहकलम ४,६ बाललैगिक अत्याचार प्रतिबंधक कायद्यान्वये गुन्हा नोंद केला आहे. आरोपीला अटक करण्यात आली असून गुन्हाचा पुढील तपास काटोल विभागाचे पास्को सेलच्या पोउपनी पूनम कोरडे आहे.